ഞാൻ വെറും പോഴൻ

My photo

മിക്കവാറും എല്ലാ മതങ്ങളും പറയുന്നു, ദൈവത്തെപ്പോലെയാവാന്‍. എന്നാല്‍ ഞാന്‍ നല്ലൊരു മനുഷ്യന്‍ പോലും അല്ല..
ആര്‍ക്കെങ്കിലും ഞാനൊരു നല്ല മനുഷ്യനായി തോന്നിയാല്‍ അത് അവരുടെ മാത്രം കാഴ്ചപ്പാടാണ്. അതിനു ഞാന്‍ ഉത്തരവാദിയല്ല.....

Wednesday, 7 June 2017

"ആക്ഷൻ ഹീറോ ബിജു"വിന് പിന്നിൽ ഒളിച്ചിരിക്കുന്ന പേപ്പട്ടികൾ ...

(മുൻ‌കൂർ മാപ്പ് : വിശേഷ ദിവസങ്ങളിൽ അവധിയില്ലാതെയും കാക്കത്തണൽ പോലുമില്ലാത്ത ട്രാഫിക് ജംക്ഷനുകളിൽ പൊള്ളിത്തളർന്നും അക്രമാസക്തരായ ജനക്കൂട്ടത്തിന്റെ തെറിയും കല്ലേറും ഏറ്റു വാങ്ങിയും വൃത്തി കെട്ട ഹയരാർക്കിയൽ അധികാര ഘടനയുടെ അസ്വസ്ഥത പേറിയും അനാഥജഡത്തിന് കാവൽ നിന്നും ഒക്കെ ചെയ്യുന്ന പോലീസ് സേവനങ്ങളെ ചെറുതായി കാണുകയാണെന്ന് തോന്നരുതേ. ഭൂരിഭാഗം വരുന്ന നന്മ നിറഞ്ഞ പൊലീസുകാരെ ഉദ്ദേശിച്ചല്ല ഈ കുറിപ്പ്. ഇത് വായിച്ച് ആർക്കെങ്കിലും മനോവേദന തോന്നിയാൽ ക്ഷമിക്കുക)


അതി ശക്തനെന്നും ഇരട്ടച്ചങ്കനെന്നും പാണന്മാർ പാടി നടക്കുന്ന മുഖ്യമന്ത്രിയാണ് ഇന്ന് നമുക്കുള്ളത്. അദ്ദേഹം നമ്മുടെ ആഭ്യന്തര മന്ത്രി കൂടെയാണ്. കാക്കിയിട്ട ക്രൂരതയുടെ തിക്തഫലങ്ങൾ ഏറെ അനുഭവിച്ചയാളാണ് അദ്ദേഹവും അദ്ദേഹം ഉൾപ്പെടുന്ന പ്രസ്ഥാനത്തിലെ നല്ലൊരു ശതമാനം അംഗങ്ങളും. അങ്ങനെ ഒരാൾ ഭരിക്കുമ്പോഴും  ഈ കൊച്ചു സംസ്ഥാനത്ത്, ദിനം പ്രതി പോലീസ് ക്രൂരതകളുടെ വാർത്തകൾ, മുൻഗാമികളുടെ കാലത്തേത് പോലെ തന്നെ ആവർത്തിക്കപ്പെടുന്നു. 

പരാതിക്കാരോട് പോലീസുദ്യോഗസ്ഥര്‍ ആര്‍ദ്രതാപൂര്‍ണമായ സമീപനവും അനുകമ്പയും പുലര്‍ത്തണമെന്ന് സംസ്ഥാന പോലീസ് മേധാവി ടി.പി. സെന്‍കുമാര്‍ നിര്‍ദ്ദേശിച്ചിരിക്കുന്നു. ജനങ്ങളോട്, വിശേഷിച്ച് സ്ത്രീകളോടും കുട്ടികളോടും ഏറ്റവും മാന്യമായി പെരുമാറണമെന്നും ഇക്കാര്യം ജില്ലാ പോലീസ് മേധാവിമാര്‍ ഉറപ്പാക്കണമെന്നും സംസ്ഥാന പോലീസ് മേധാവി നിര്‍ദേശിച്ചു. പോലീസ് ആസ്ഥാനത്ത് ലഭിക്കുന്ന പരാതികളില്‍ വളരെയധികവും ഉദ്യോഗസ്ഥരുടെ മനുഷ്യത്വപരമല്ലാത്ത പെരുമാറ്റത്തെക്കുറിച്ചുള്ളതായതിനാലാണ് ഡിജിപിയുടെ പുതിയ നിര്‍ദ്ദേശം. ജനങ്ങളോടുള്ള മോശം പെരുമാറ്റം സംബന്ധിച്ച് ഓരോ ജില്ലയില്‍ നിന്നുമുള്ള പരാതികളുടെ എണ്ണം ആ ജില്ലയിലെ ജില്ലാ പോലീസ് മേധാവിമാര്‍ ഇക്കാര്യത്തിലെടുക്കുന്ന ശുഷ്‌കാന്തിയുടെ സൂചകമായി കണക്കാക്കും. ജില്ലാതലത്തില്‍ ഏറ്റവും നല്ല രീതിയില്‍ പെരുമാറ്റം ഉറപ്പാക്കുന്ന പോലീസ് സ്റ്റേഷനുകള്‍ക്ക് ഓരോ വര്‍ഷവും പ്രത്യേകം അനുമോദനങ്ങള്‍ നല്‍കുന്ന കാര്യവും ജില്ലാ പോലീസ് മേധാവിമാര്‍ക്ക് പരിഗണിക്കാവുന്നതാണെന്നും ഡിജിപി നിര്‍ദ്ദേശിച്ചു.

കടല്‍ത്തീരത്ത് കുടുംബസമേതം വിശ്രമിക്കാനെത്തിയ സിപിഐ-എം ബ്രാഞ്ച് സെക്രട്ടറിക്കും സുഹൃത്തിനും കുടുംബത്തിനും നേരെ അതി ക്രൂരമായ നരനായാട്ട് നടത്തിയ പോലീസ് ഉദ്യോഗസ്ഥനെതിരെ വധശ്രമത്തിന് കേസെടുത്ത്  സര്‍വീസില്‍ നിന്ന് പിരിച്ചുവിടണമെന്ന് വി.എസ് ആവശ്യപ്പെട്ടിട്ട് അധികം കാലമായില്ല. ജനങ്ങളെ ഭീതിയിലാഴ്ത്തിയല്ല പോലീസിന്റെ മനോവീര്യം നിലനിര്‍ത്തേണ്ടതെന്നും അദ്ദേഹം പ്രസ്താവിച്ചു. വടക്കാഞ്ചേരിയില്‍ സിപിഎം കൗണ്‍സിലറും മറ്റു മൂന്നു പേരും ചേര്‍ന്ന് യുവതിയെ പീഡിപ്പിച്ച സംഭവത്തിലെ അന്വേഷണത്തില്‍ വീഴ്ച വരുത്തിയെന്ന് ആരോപണം നേരിട്ട പേരാമംഗലം സിഐ മണികണ്ഠനെതിരെ നടപടിയെടുത്തത് തും അടുത്ത കാലത്താണ്. കേസിന്റെ തെളിവെടുപ്പിനിടെ യുവതിയോട് അപമര്യാദയായി പെരുമാറിയെന്നായിരുന്നു ഇയാള്‍ക്കെതിരായ ആരോപണം. നാലു പേര്‍ പീഡിപ്പിച്ചതിനേക്കാള്‍ വലിയ ബലാത്സംഗമാണ് പേരാമംഗലം സിഐയില്‍ നിന്നും നേരിടേണ്ടി വന്നതെന്ന് യുവതി ആരോപിച്ചിരുന്നു. പ്രതികളെ ചൂണ്ടിക്കാട്ടി ഇവരില്‍ ആര് ബലാത്സംഗം ചെയ്തപ്പോഴായിരുന്നു നിനക്ക് ഏറ്റവും കൂടുതല്‍ സുഖമെന്ന് സിഐ ചോദിച്ചത്രേ. ഇഷ്ടപ്പെട്ട സൈസ് ഏതാണെന്നും പൊലീസ് ചോദിച്ചതായി യുവതി ആരോപിച്ചിരുന്നു. പേരാമംഗലം സിഐ യുടെ അസഭ്യവർഷവും സമ്മർദ്ദവും സഹിക്കാനാവാതെയാണ് കോടതിയില്‍ മൊഴിമാറ്റിപ്പറഞ്ഞതെന്നും യുവതി പറഞ്ഞു. മധു അമ്പലത്തൂരെന്ന രാഷ്ട്രീയക്കാരനും പോലീസും കൂടിയിരുന്നാണ് തന്നെ മാറ്റിപ്പറയാനുള്ള മൊഴി പഠിപ്പിച്ചതെന്നും യുവതി ആരോപിച്ചിരുന്നു.

മുൻ ആഭ്യന്തര മന്ത്രിയും ഇപ്പോഴത്തെ പ്രതിപക്ഷ നേതാവും പ്രതിനിധീകരിക്കുന്ന മണ്ഡലത്തിൽ നിന്ന് കേട്ട ഒരു "ഷോക്കിങ് ന്യൂസ്" ചുമ്മാ വായിച്ചു മറന്ന് കളയാൻ മനസ്സ് സമ്മതിക്കുന്നില്ല. ഓട്ടോ ഓടിച്ച് ഉപജീവനം നടത്തുന്ന കൃഷ്ണകുമാർ എന്ന മധ്യവയസ്‌കൻ; തന്റെ, മകളുടെ മാനത്തിന് സുരക്ഷിതത്വ ഭീഷണി നേരിട്ടപ്പോൾ ഈ നാട്ടിലെ പോലീസ് സംവിധാനത്തെ നീതിക്കും സുരക്ഷയ്ക്കും വേണ്ടി സമീപിച്ചു. പക്ഷെ, അയാളെ കാത്തിരുന്നത് നീതിയോ സുരക്ഷയോ ആയിരുന്നില്ല. ആസൂത്രിതമായ ഭീഷണികൾ ആയിരുന്നു. താൻ കൊടുത്ത പരാതിയുടെ പേരിൽ സ്വന്തം മകന്റെ ജീവനും ജീവിതവും കൂടി അപകടത്തിലാവുന്നു എന്ന പേടിപ്പെടുത്തുന്ന തിരിച്ചറിവ് കൂടി കിട്ടിയ ആ സാധു മനുഷ്യൻ നിയമസംവിധാനങ്ങളുടെ നിസ്സംഗതയെയും മാധ്യമങ്ങളുടെ നിശബ്ദതയെയും പരിഹസിച്ചു കൊണ്ടും വെല്ലു വിളിച്ചു കൊണ്ടും ആത്മഹത്യ ചെയ്തു. ലോക്കൽ പോലീസ് സംവിധാനം നീതിപൂർവ്വകമായി പ്രവർത്തിച്ചിരുന്നെങ്കിൽ അയാൾ ഇന്നും ഈ നാട്ടിൽ ജീവിച്ചിരിക്കുമായിരുന്നു.

ഹെൽമെറ്റില്ലെന്ന കാരണത്താൽ സന്തോഷ് എന്ന യുവാവിനെ പൊലീസുകാരൻ തലയ്ക്ക് വയർലെസ് കൊണ്ട് അടിച്ച വാർത്ത കുറച്ച് നാളുകൾക്ക് മുൻപ് വൈറൽ ആയിരുന്നു. ആശുപത്രിയിൽ കഴിയുന്ന അമ്മയെ കാണുന്നതിനായി, കൈക്കുഞ്ഞുമായി ബൈക്കിൽ പോകുമ്പോഴായിരുന്നു യുവാവിനെതിരായി പൊലീസുകാരന്‍റെ ക്രൂരനടപടി ഉണ്ടായത്. കൊല്ലം, ആശ്രാമം മൈതാനത്തിനു സമീപം ലോറിക്കു മറവില്‍ നിന്നു ഹെല്‍മെറ്റ് പരിശോധന നടത്തുകയായിരുന്ന ആശ്രാമം ട്രാഫിക് സ്റ്റേഷനിലെ പൊലീസ് ഉദ്യോഗസ്ഥന്‍ ബൈക്കിനു മുന്നില്‍ ചാടി വീണു കൈ കാണിച്ചു.  യുവാവ് അല്‍പ്പം മുന്നോട്ടു മാറ്റിയാണു ബൈക്കു നിര്‍ത്തിയത്. ഇതില്‍ പ്രകോപിതനായ പോലീസുകാരൻ, കൈ കാണിച്ചാല്‍ നീ ബൈക്ക് നിര്‍ത്തില്ലേ എന്ന് ആക്രോശിച്ചു വയര്‍ലെസ് സെറ്റുകൊണ്ടു തലയ്ക്കു അടിക്കുകയായിരുന്നു എന്നാണ് സന്തോഷിന്റെ പരാതി. തുടര്‍ന്നു കുട്ടിയുമായി റോഡിലിരുന്നു പ്രതിഷേധിച്ച യുവാവിനെ കൂടുതല്‍ പൊലീസുകാരെത്തി ആശുപത്രിയിലേക്കു മാറ്റി. സന്തോഷിന്റെ ചെവിക്കു മുകളിലായാണ് പരുക്ക്. ചെവിക്കുള്ളിലെ പൊട്ടല്‍ ഗുരുതരമാണെന്നും ഇന്‍ഫെക്ഷനാകാന്‍ സാധ്യതയുണ്ടെന്നതിനാല്‍ ഐസിയുവിലേക്കു മാറ്റിയെന്നുമാണ് റിപ്പോർട്ട്. നാടിനെ കലുഷിതമാക്കുന്ന പ്രവർത്തിയാണ് നടന്നതെന്നും അപക്വവും അക്രമാസക്തവുമായ ഈ പൊലീസുകാരന്‍റെ സമീപനം മൊത്തം പൊലീസ് സേനയ്ക്കും അപമാനകരമാണെന്നും ആഭ്യന്തരമന്ത്രി കൂടിയായ മുഖ്യമന്ത്രിയ്ക്ക് പറയേണ്ടി വന്നു. 

ജനാധിപത്യഭരണം നില നില്‍ക്കുന്ന കേരളമെന്ന സംസ്ഥാനം നിലവില്‍ വന്ന അന്ന് മുതല്‍ പോലീസ് മൃഗ തുല്യരായി പെരുമാറിയ ഒരു പാട് സംഭവങ്ങള്‍ കേരള ജനത കേട്ടിട്ടുണ്ട്. നക്സല്‍ വര്‍ഗീസിനെ കെട്ടിയിട്ടു വെടി വച്ചു കൊന്നത്, രാജനെ ഉരുട്ടി കൊന്നു ശവം പോലും വീണ്ടെടുക്കാനാവാത്ത വിധം നശിപ്പിച്ചത്, തങ്കമണി കൂട്ട ബലാല്‍സംഗം, ആലുവ കീഴ്മാട് അന്ധ വിദ്യാലയത്തിലെ തേർ വാഴ്ച, അങ്കമാലി മുതല്‍ ഒട്ടനവധി വെടി വയ്പ്പുകള്‍, ഉരുട്ടി കൊലപാതകങ്ങള്‍, മറ്റു തരത്തിലുള്ള ലോക്ക് അപ്പ്‌ കൊലപാതകങ്ങള്‍, മലവും മൂത്രവും ഭക്ഷിപ്പിച്ച സംഭവങ്ങള്‍, കേട്ടാലും വായിച്ചാലും കണ്ണും കാതും പൊത്തിപ്പോകുന്ന ന്രിശംസ്യതകള്‍ തുടങ്ങി പ്രജകളെ കൊല്ലാതെ കൊന്ന നിരവധി അനവധി സംഭവങ്ങള്‍. മീശ, പുരികം, കണപീലി മുതലായവ വലിച്ചു പറിച്ച സംഭവങ്ങള്‍ പണ്ടുണ്ടായിട്ടുണ്ട്. സമരക്കാരെയും കസ്റ്റഡിയില്‍ വരുന്നവരെയും ജനക്കൂട്ടത്തെയും നേരിടാന്‍ പോലീസിന് ഒന്നും രണ്ടും മൂന്നും അതിനപ്പുറവും മുറകള്‍ ഉണ്ടായിരുന്നു. “ക്രമ സമാധാന പാലനത്തിന്റെ“ ഭാഗമായി ജനനേന്ദ്രിയം വലിച്ചു പറിക്കാന്‍ നോക്കുക, ഞെരിച്ചുടക്കുക പുതിയ കലാപരിപാടികളും ഇടയ്ക്ക് റിപ്പോർട്ട് ചെയ്യപ്പെട്ടിരുന്നു. ഇതില്‍ ഒട്ടു മിക്കതിനും ഭരിക്കുന്നവരുടെ ഒത്താശയും ആത്മാര്‍ത്ഥ പിന്‍തുണയും വേണ്ടത്ര ഗൂഡാലോചനയുടെ പിന്‍ബലവും  എല്ലാം ഉണ്ടാകാറുണ്ട്. രാഷ്ട്രീയ എതിരാളികളെ പോലീസിനെ ഉപയോഗിച്ച് അടിച്ചമര്‍ത്തുന്ന ഭരണകൂട ഭീകരത എന്നും എക്കാലത്തും ഉണ്ടായിരുന്നു. ഭരണകൂടമുണ്ടെങ്കില്‍ അതിന്റെ ഭീകരതയും ഉണ്ടാവും എന്നതിന്റെ എന്നത്തേയും തെളിവുകളായി ഈ സംഭവങ്ങള്‍ ചരിത്രത്തില്‍ കുറിക്കപ്പെട്ടു കൊണ്ടിരുന്നു. ചില സന്ദർഭങ്ങളിൽ പണമോ മറ്റേതെങ്കിലും തരത്തിലോ പോലീസിനെ സ്വാധീനിച്ച് ആളുകളെ കേസിൽ കുടുക്കുകയും ഇടിച്ചു നട്ടെല്ലൊടിക്കുകയും ചെയ്യുന്ന സംഭവങ്ങളും ഉണ്ടാവാറുണ്ട്. 

ജോലിക്ക് നിന്നിരുന്ന ഡോക്ടറുടെ വീട്ടില്‍ നിന്ന് സ്വര്‍ണാഭരണങ്ങള്‍ മോഷ്ടിച്ചുവെന്നാരോപിച്ച്‌ കസ്റ്റഡിയില്‍ എടുത്ത ചേരാനെല്ലൂർ സ്വദേശിനി ലീബ പോലീസ് കസ്റ്റഡിയില്‍ ക്രൂര മര്‍ദനത്തിനിരയായ വാർത്ത വൻ പ്രതിഷേധത്തിനിടയാക്കിയിരുന്നു. കസ്റ്റഡിയിലെ  ക്രൂര മര്‍ദനത്തെത്തുടർന്ന് ലീബയ്ക്ക് തലയ്ക്കും നട്ടെല്ലിനും മാരകമായ പരിക്കേറ്റതിനെ തുടര്‍ന്ന് ഇന്നും ചികിത്സയിൽ കഴിയുകയാണ്. സംഭവം നടന്ന് രണ്ട് വർഷത്തോളമായിട്ടും തൊണ്ടിമുതല്‍ കണ്ടെത്തുന്നതിനോ, ലീബയ്‌ക്കെതിരെ കേസ് തെളിയിക്കുന്നതിനോ പോലീസിന് കഴിഞ്ഞില്ല. എന്നാല്‍ ലീബയ്ക്ക് നീതി ലഭ്യമാക്കണമെന്ന് ആവശ്യപ്പെട്ട് സമരം ചെയ്ത നാട്ടുകാര്‍ക്കെതിരെ കേസെടുക്കുന്ന കാര്യത്തില്‍  പോലീസ് നല്ല ശുഷ്‌കാന്തി കാണിച്ചിരുന്നു. ഒമ്പത് കേസുകളിലായി നൂറോളം പേര്‍ക്കെതിരെ പോലീസ് അടിയന്തിരമായി കേസെടുത്തു. ലീബയുടെ കേസന്വേഷണം ഇഴയുമ്പോഴും നീതിക്കു വേണ്ടി പോരാടിയ നാട്ടുകാര്‍ കോടതി കയറിയിറങ്ങുകയാണ്. 

സ്‌കൂള്‍ ബസ്സില്‍ ഡ്രൈവറായ സുരേഷ് എന്ന ചെറുപ്പക്കാരൻ, ആറു വയസ്സുകാരനെ പ്രകൃതിവിരുദ്ധ പീഡനത്തിനിരയാക്കിയെന്ന് ആരോപിച്ച് കൊച്ചി ഹാർബർ പോലീസ് സ്റ്റേഷനിൽ കൊണ്ട് വന്ന് ഇടിച്ചു നടുവ് തളർത്തിയിട്ടിട്ട് ഒരു മാസം ആവുന്നേ ഉള്ളൂ. കള്ളക്കേസുണ്ടാക്കിയാണ് ഇയാളെ അറസ്റ്റ് ചെയ്ത് പീഡിപ്പിച്ചതെന്ന് റിപ്പോർട്ടുകൾ ഉണ്ട്. കുട്ടിയുടെ പിതാവും സുരേഷും തമ്മിലുള്ള ചില തര്‍ക്കങ്ങളുടെ തുടര്‍ച്ചയായി കുട്ടിയുടെ പിതാവിന്റെ അടുത്ത സുഹൃത്തായ പോലീസുകാരന്റെ താത്പര്യപ്രകാരമാണ് അറസ്റ്റ് നാടകം നടത്തിയതെന്നും പത്ര റിപ്പോർട്ടുകൾ പറയുന്നു.

എന്നാൽ, ശാരീരിക പീഢന ക്ഷമതയോട് കിട പിടിക്കുന്ന മാനസിക പീഡന ക്ഷമതയും തങ്ങൾക്കുണ്ടെന്ന് പോലീസ് തെളിയിച്ച സംഭവം കഴിഞ്ഞ മാസം ഗുരുവായൂരിൽ സംഭവിച്ചിരുന്നു. ക്ഷേത്രത്തിൽ വിവാഹം കഴിഞ്ഞ് വീട്ടിലേക്കു മടങ്ങുകയായിരുന്ന നവദമ്പതികളെ മൂന്നു മണിക്കൂറാണ് പോലീസ്‌സ്റ്റേഷനിൽ പിടിച്ചിരുത്തിയത്. വിവാഹശേഷം വീട്ടിലേക്കുള്ള യാത്രയിൽ നവവരൻ തന്നെയാണ് കാർ ഒാടിച്ചിരുന്നത്. കാർ ഒരു ട്രാഫിക് പോലീസുകാരനെ ചെറുതായി തട്ടി. ഭാഗ്യാവശാൽ, അദ്ദേഹത്തിന് കാര്യമായ പരിക്കൊന്നും സംഭവിച്ചില്ല. പക്ഷെ, പോലീസിന്റെ കൃത്യനിർവ്വഹണബോധം സട കുടഞ്ഞെഴുന്നേറ്റു. വൺവേ തെറ്റിച്ചു, വരൻ മൊബൈൽഫോണിൽ സംസാരിച്ചു, പോലീസുകാരന്റെ ഡ്യൂട്ടി തടസ്സപ്പെടുത്തി തുടങ്ങി കാൽ ഡസനോളം  കുറ്റങ്ങൾ ചാർത്തിയാണ് ഈ നവദമ്പതികളെ ബന്ദികളാക്കിയത്. ഈ വരൻ ചെയ്തു എന്ന് പറയപ്പെടുന്ന കാര്യങ്ങൾ എല്ലാം ഗൗരവമായ കുറ്റങ്ങൾ തന്നെയാണ്. അതിന് നിയമം അനുശാസിക്കുന്ന കൃത്യമായ നടപടികൾ സ്വീകരിക്കേണ്ടതിനു പകരം  വരനെയും, ഇതിലൊന്നും പങ്കില്ലാത്ത വധുവിനെയും വിവാഹവേഷത്തിൽ പോലീസ്‌സ്റ്റേഷനിൽ മണിക്കൂറുകൾ പിടിച്ചിരുത്തിയ നടപടി തികഞ്ഞ സാഡിസമല്ലാതെ മറ്റെന്താണ്. മതപരമായ വിവാഹചടങ്ങിന്റെ ആചാരപരമായ പ്രസക്തിയിൽ വിശ്വസിക്കുന്നവരും ഇല്ലാത്തവരും എല്ലാം നമുക്ക് ചുറ്റുമുണ്ട്. എന്നാൽ, ഇതിലെല്ലാം വിശ്വസിക്കുന്നവർക്ക് മുഹൂർത്തവും ഗൃഹപ്രവേശവും എല്ലാം പവിത്രവും പ്രധാനപ്പെട്ടതുമാണ്. ഗുരുവായൂർ സംഭവത്തിൽ വിവാഹ ശേഷമുള്ള ശുഭമുഹൂർത്തത്തിലെ ഗൃഹപ്രവേശം നടത്താൻ പോലീസ് നവദമ്പതികളെ അനുവദിച്ചില്ല. പോലീസ് ആരോപിക്കുന്ന കുറ്റങ്ങളിലൊന്നും പങ്കാളിയല്ലാത്ത ആ വധു തന്റെ ജീവിതത്തിലെ സന്തോഷകരമായ ആ ദിവസത്തിൽ കുറ്റവാളി കണക്കെ പോലീസ്‌സ്റ്റേഷനിൽ മണിക്കൂറുകൾ ചെലവിടേണ്ടി വന്നതിന്റെ മാനസിക ആഘാതത്തിന് എന്ത് പരിഹാരമാണുള്ളത്.

സാന്ദർഭികമായി, മുൻ ആലുവ റൂറൽ എസ് പി യതീഷ് ചന്ദ്രയുടെ സോഷ്യൽ മീഡിയ വൈറൽ അങ്കമാലി ലാത്തിച്ചാർജിന്റെ പശ്ചാത്തലത്തിൽ, അഴിമുഖം.കോം - ൽ ഉണ്ണികൃഷ്ണൻ കാസ്റ്റ് ലെസ്സ് എഴുതിയ ഒരു ലേഖനത്തിലെ പ്രസക്ത ഭാഗങ്ങൾ കൂടി ചേർക്കുകയാണ്. 

""കാക്കിക്കുള്ളിലെ നായാട്ടുപ്രേമികളുടെ സൈക്കിക് വൈബ്രേഷനുകള്‍ക്ക് ജനങ്ങളും മനുഷ്യാവകാശ പ്രവര്‍ത്തകരും വിദ്യാര്‍ഥി രാഷ്ട്രീയ നേതാക്കളും ലൈംഗീക അതിക്രമകേസുകളിലെ ഇരകളും പാവപ്പെട്ടവനും ഇരയായിത്തുടങ്ങിയിട്ട് കാലം കുറച്ചായി. ഉത്തരേന്ത്യയിലെ ദരിദ്രഗ്രാമങ്ങളില്‍ മാത്രം അവശേഷിക്കുന്നു എന്ന് ധരിച്ചിരുന്ന കുട്ടന്‍പിള്ള ( ആ പേരുള്ള നല്ല മനുഷ്യര്‍ എന്നോട് പൊറുക്കട്ടെ) പോലീസ് സംസ്കാരത്തിന്‍റെ ഉത്തരാധുനിക പതിപ്പാണ്‌ യതീഷ് ചന്ദ്ര എന്ന ഐ പി എസ് ഏമാന്‍. ഒരുപക്ഷേ മലയാള സിനിമയ്ക്ക് സുരേഷ് ഗോപിക്ക് ശേഷം ലഭിക്കാന്‍ സാധ്യതയുള്ള ഗര്‍ജിക്കുന്ന സിങ്കം ആയി നാളെ ഇദ്ദേഹം മാറില്ലെന്ന് ആരുകണ്ടു. തലവര നന്നെങ്കില്‍ ബോളിവുഡിലും എത്തിയേക്കാം. ഇനിയൊരവസരം കിട്ടുമ്പോള്‍ ക്യാമറയും തുറന്നുവച്ച് നാല് പൊളപ്പന്‍ ഡയലോഗും പറഞ്ഞ് പാവം ജനങ്ങളുടെ മേലെ മേഞ്ഞ് അരയിലെ തോക്കിലെ നാല് ഉണ്ടയും പൊട്ടിച്ചുകളഞ്ഞാല്‍ ഇന്ന് കിട്ടിയ പതിനായിരം ഫേസ്ബുക്ക് ലൈക്ക് ഒരു ലക്ഷമായി ഉയര്‍ത്താം. അമ്മയെ തല്ലിയാലും രണ്ട് പക്ഷമുള്ള നാട്ടില്‍ മാനസിക വൈകല്യമുള്ള പോലീസുകാര്‍ക്കുമുണ്ടാകും ജയ് വിളിക്കാനും ഫാന്‍സ്‌ ക്ലബ് രൂപികരിക്കാനും ആളുകള്‍. എന്നുകരുതി ഇതുതന്നെ സ്വര്‍ഗരാജ്യമെന്നു കരുതിയാല്‍ പ്ലാന്‍ പാളും. പഴയ ഫ്യൂഡല്‍ മാടമ്പി പോലീസ് ഏര്‍പ്പാടുകള്‍ തട്ടുമ്പുറത്തായിട്ട് കാലമേറെയായി എന്ന് അദ്ദേഹത്തിന് ആര് പറഞ്ഞ്കൊടുക്കും? കാരണം ഹിറ്റ്ലറും മുസ്സോളിനിയും മരിച്ചിട്ട് നാളേറെയായി സാറേ. ജേക്കബ് പുന്നൂസ് അടക്കമുള്ള മനുഷ്വത്വമുള്ള പോലീസുകാര്‍ ഉള്ള കൂട്ടത്തില്‍ തന്നെയാണിതെന്നും അറിയുമ്പോഴാണ് നാനാത്വത്തില്‍ ഏകത്വം എന്നത് പോലീസുകാരെ സംബന്ധിച്ചെങ്കിലും എത്ര നേരാണെന്ന് അറിയുന്നത്. 

എസ് പിയോടാണോ കളി എന്ന് യതീഷ് ചന്ദ്ര ചോദിക്കുന്നത് കേട്ടു. ശരി... കളി അറിയാവുന്ന നിങ്ങള്‍ പോലീസുകാര്‍ നന്നായറിഞ്ഞു കളിച്ച ചില കാര്യങ്ങള്‍ പറയട്ടെ സാര്‍? കുറഞ്ഞത് ഇതൊക്കെ ഉള്ളതാണെന്നെങ്കിലും സമ്മതിക്കുമോ അങ്ങ്?

* ഏറണാകുളത്ത് നിന്നും കഞ്ചാവുമായി അറസ്റ്റ് ചെയ്ത പ്രതികളില്‍ നിന്നും പോലീസ് വിലപേശി കൈക്കൂലി വാങ്ങിയെന്ന പ്രതികളുടെയും അവരുടെ ബന്ധുക്കളുടെയും വെളിപ്പെടുത്തല്‍ താങ്കള്‍ അറിഞ്ഞിരുന്നോ?

*വൻ തട്ടിപ്പ് കേസിലെ പ്രതിയായ കവിത പിള്ളയെ പോലീസുകാര്‍ക്ക് കൈക്കൂലി എത്തിക്കാനും കേസുകള്‍ ഒതുക്കാനുമുള്ള ഇടനിലക്കാരിയായി പോലീസുകാര്‍ തന്നെ 'നിയമിച്ചത്' താങ്കള്‍ അറിഞ്ഞിരുന്നോ?

* പാവം ഒരു സെക്യൂരിറ്റി ജീവനക്കാരനെ വണ്ടി കയറ്റിക്കൊന്ന പണച്ചാക്കായ ക്രിമിനലിനെ രക്ഷിക്കാന്‍ എഫ് ഐആറില്‍ വെള്ളം ചേര്‍ത്തും സെക്യൂരിറ്റി ജീവനക്കാരന്‍റെ മരണമൊഴി എടുക്കാതെയും 'സഹകരിച്ച' പോലീസുകാര്‍ നിങ്ങളുടെ കൂട്ടത്തില്‍ ഉണ്ടെന്ന് അറിഞ്ഞിട്ടുണ്ടോ താങ്കള്‍?

*അതേ ക്രിമിനലിന് ജയിലിനുള്ളില്‍ സകല സഹായവും ചെയ്ത് കൊടുക്കുന്നത് പോലീസുകാര്‍ തന്നെയെന്നു അറിഞ്ഞിട്ടുണ്ടോ താങ്കള്‍?""

ഉണ്ണികൃഷ്ണന്റെ ചോദ്യങ്ങൾ നേരിട്ട് യതീഷ് ചന്ദ്രയോടാണെങ്കിലും അത് ചെന്ന് പതിയ്ക്കുന്നത് മൊത്തം പോലീസ് സംവിധാനത്തിന്റെ ചെവിയിലാണ്. 

കാലാകാലങ്ങളിൽ സ്വീകരിച്ച മനുഷ്യപക്ഷ പരിഷ്‌കാരങ്ങൾ കൊണ്ട്, പോലീസ് മുൻകാലങ്ങളെ അപേക്ഷിച്ച്  കുറച്ചൊക്കെ ജനമൈത്രി ആർജ്ജിച്ചിട്ടുണ്ട്. എന്നാൽ, ആഭ്യന്തര മന്ത്രാലയം, പോലീസ് കംപ്ലയിന്റ് അതോറിറ്റി, മനുഷ്യാവകാശ കമ്മീഷൻ, നീതിപീഠങ്ങൾ മുതലായ നിരീക്ഷണ സംവിധാനങ്ങളുടെയെല്ലാം വ്യക്തമായ നിർദ്ദേശങ്ങളെ തൃണവൽഗണിച്ചു കൊണ്ട് കാക്കിക്കുള്ളിലെ ഏതാനും ചില മൃഗതുല്യർ നിരന്തരം ഏർപ്പെടുന്ന മനുഷ്യാവകാശലംഘനങ്ങളെ അധികാരികൾ ഇനിയും അവഗണിക്കരുത്. അത് ജനങ്ങളിൽ വീണ്ടും പോലീസിനെ പറ്റി ഭീതിയും അവിശ്വാസവും വളർത്താനേ ഉപകരിക്കൂ. കാട്ടുനീതിയുടെ കാവൽ നായ്ക്കളോടും കറുത്ത ലോകത്തിന്റെ അധിപരോടും സഹവർത്തിത്വവും ഗതികെട്ട സാധാരണ പൊതുജനത്തോട് വിദ്വേഷവും ശത്രുതാ മനോഭാവവുമാണ് പോലീസ് പുലർത്തുന്നതെങ്കിൽ ആ പോലീസ്, നിയമ നീതി സംവിധാനങ്ങളുടെ സംരക്ഷകരല്ല, മറിച്ച് പൗരന്റെ സ്വാതന്ത്ര്യത്തിന്റെയും സമാധാനത്തിന്റെയും അന്തകരാണ്. പോലീസിൽ നവീകരണത്തെക്കാൾ അത്യാവശ്യം മാനവീകരണമാണ്. യൂണിഫോം ഇട്ട എല്ലാ വിഭാഗങ്ങളുടെയും ഒരു ഗതി കേടുണ്ട്. ഒരാൾ കാണിക്കുന്ന മോശം കാര്യത്തിനും ആ കുപ്പായം ഇട്ട മറ്റുള്ളവരും അടച്ചു പഴി കേൾക്കും. അത് പൊലീസോ പട്ടാളമോ വക്കീലോ പള്ളീലച്ചനോ കന്യാസ്ത്രീയോ ആരായാലും....അതിനാൽ കുറ്റം ചെയ്യുന്നവരെ ന്യായീകരിക്കാതെ നിയമത്തിന്റെ കൈകളിൽ വിട്ടു കൊടുക്കുകയാവും ഭൂരിഭാഗത്തിന് നല്ലത്. അല്ലാതെ, ഒറ്റപ്പെട്ട മോശം സംഭവങ്ങൾ വരുമ്പോൾ വർഗ്ഗബോധം മൂത്ത് തലയിൽ ഓളം വെട്ട് തുടങ്ങിയാൽ പിന്നെ തരവഴി കാണിച്ചവനെ ചുമലിലേറ്റുന്നവർ ഒക്കെ നാറും. ചത്ത ഒറ്റ ഈച്ച വീണാൽ മതി ഒരു കുടം വീഞ്ഞ് മൊത്തം ചീത്തയാവാൻ. പിന്നെ, പോലീസ് മാഫിയ ആണെന്ന് ഒക്കെ പറഞ്ഞാൽ സമ്മതിക്കാൻ തലയ്ക്കു വെളിവുള്ള ആരും വരുമെന്ന് എനിക്കും തോന്നുന്നില്ല. മോശം സംഭവങ്ങൾ എല്ലാം ഒറ്റപ്പെട്ടത് തന്നെയായി കാണാനാണ് എനിക്കും ഇഷ്ടം. പക്ഷെ ഒറ്റപ്പെട്ട സംഭവങ്ങളുടെ എണ്ണം ഏറിവന്നാൽ അതിനെ ഒറ്റപ്പെട്ടത് എന്ന് കാണാൻ യുക്തി അനുവദിക്കില്ല എന്ന സത്യം അവശേഷിക്കുന്നു.

ഓർക്കുക, തമിഴിൽ പൊലീസിന് കാവൽ എന്നാണ് വിളിപ്പേര്. ഇന്ത്യയിൽ ഒരിടത്തും, വിശേഷിച്ചു കേരളത്തിൽ പോലീസിനെ ആ പേരിട്ട് ആത്മാർത്ഥതയോടെ വിളിക്കാനാവുമോ ?  പോലീസ് മേധാവിയുടെ പുതിയ നിർദ്ദേശങ്ങൾ കൊണ്ട് നമ്മുടെ പോലീസ് "കാവൽ" ആകുമെന്ന് പ്രതീക്ഷിക്കാനാകുമോ ? ഇല്ലെന്നാണ് എന്റെ തോന്നൽ... 

(പഴയ പോസ്റ്റ് ആയിരുന്നു;  കാലിക പ്രസക്തി നഷ്ടപ്പെടാത്തത് കൊണ്ട് സമകാലിക സംഭവങ്ങൾ കൂടി ചേർത്ത് ഒന്ന് അപ്‌ഡേറ്റ് ചെയ്തിട്ടുണ്ട്)

ഈ ബ്ലോഗിലെ പുതിയ പോസ്റ്റുകള്‍ ലഭിക്കാൻ താഴെയുള്ള ലിങ്കി ക്ലിക്ക് ചെയ്തിട്ടു ആ ഫേസ്‌ബുക്ക് പേജ് ലൈക്‌ ചെയ്യുക

https://www.facebook.com/achayatharangal.blogspot.in

അല്ലെങ്കില്‍  താഴെയുള്ള ലിങ്കില്‍ ക്ലിക്ക് ചെയ്തിട്ടു ആ ഫേസ്‌ബുക്ക് ഗ്രൂപ്പില്‍ ജോയിന്‍ ചെയ്യുക

https://www.facebook.com/groups/224083751113646/

6 comments:

  1. അച്ചായാ എന്തിനും രണ്ടു വശമുണ്ടാകും. നമ്മള്‍ ഒരു കാര്യത്തില്‍ പ്രതികരിക്കുന്നതിനു മുന്‍പ് അത് തിരക്കിയറിയാന്‍ ബാദ്ധ്യസ്ഥരാണ്. പ്രത്യേകിച്ചും ഉത്തരവാദിത്വപ്പെട്ട ഒരു സ്ഥാപനത്തിനെതിരെ ഉത്തരവാദിത്വമുള്ള ഒരു എഴുത്തുകാരന്‍ എന്ന നിലയില്‍ പ്രതികരിക്കുമ്പോള്‍... പോലിസുമായി ബന്ധപ്പെട്ട സംഭവങ്ങളില്‍ അടുത്ത കാലത്ത് വ്യക്തമായതാണല്ലോ അക്കാര്യം
    ഈ വിഷയത്തില്‍ ശ്രദ്ധിക്കേണ്ട ഒന്നു വിട്ടുപോയി ഹെല്‍മറ്റ് ഇല്ലാത്ത ഒരാളിന്റ തലയില്‍ പോലിസ് പബ്ലികായി നിന്ന് വയര്‍ലസ് സെറ്റ് വച്ച് ഇടിക്കുമെന്ന് കരുതുന്നുവോ... നോര്‍മലായി ഒന്നു ചിന്തിച്ചാല്‍ വയര്‍ലസ് സെറ്റ് വച്ച കൈകൊണ്ട് നിറുത്താന്‍ ആഗ്യം കാണിക്കുന്ന പോലിസിന്റ അടുത്തു കൂടി അമിതവേഗതയില്‍ പാഞ്ഞാല്‍ ഈ പരിക്ക് ഉണ്ടാവില്ലേ... ഉണ്ടാവും..അത് അങ്ങനെ തന്നെ സംഭവിച്ചതെങ്കില്‍..???
    പിന്നെ ഒറ്റയ്ക്കു ബൈക്കില്‍ പോയവന്‍ കുഞ്ഞുംഭാര്യയുമായി തിരിച്ചു വന്ന് റോഡ് ഉപരോധം നടത്തി എന്നത് ശ്രദ്ധിച്ചില്ലേ ..എത്ര സമയം കഴിഞ്ഞായിരുന്നു അത്.. സംഭവസ്ഥലത്തു പിടിച്ചു നിറുത്തി തലയ്ക്കിടിച്ചു എന്ന് ഇര പറയുന്നത് നമ്മള്‍ കണ്ണുമടച്ച് വിശ്വസിക്കാന്‍ മാത്രം ക്രൈഡിബിലിറ്റി ഉള്ള ആളാണോ അയാള്‍..... ആയിരിക്കുമോ..?????? സംശയമുണ്ടോ...???? വരുന്നെങ്കില്‍ ആദ്യം കരുനാഗപ്പള്ളി സ്റ്റേഷനില്‍ ഈ വ്യക്തിയുടെ പിതാവ് പോലിസിനെ ആക്രമിച്ച കേസില്‍ പ്രതിയാണോ എന്ന് അന്വേഷിക്കാമോ..????? ഈ വ്യക്തിയുടെ ജ്യേഷ്ഠന്‍ ശക്തികുളങ്ങര സ്റ്റേഷനില്‍ എന്തെങ്കിലും തരത്തില്‍ പ്രശ്നമുണ്ടാക്കിയ ആളാണോ എന്നും... ചുമ്മാ... ജീവിക്കാന്‍ വേണ്ടി വേഷം കെട്ടുന്ന പാവങ്ങളാ പോലിസുകാര് കൂടുതലും...

    ReplyDelete
    Replies
    1. സ്നേഹിതാ, നിങ്ങൾ പറഞ്ഞ കാര്യങ്ങളെ മുഖവിലക്കെടുക്കുന്നു. അവിടെ നടന്ന കാര്യങ്ങളെപ്പറ്റി മാധ്യമങ്ങളിൽ നിന്നുള്ള അറിവ് മാത്രമേ എനിക്കുള്ളൂ. അതിൽ നിങ്ങൾ പറഞ്ഞ കാര്യങ്ങൾ ഇല്ല. മാത്രവുമല്ല, ആഭ്യന്തര മന്ത്രി കൂടിയായ മുഖ്യമന്ത്രിയുടെ പ്രസ്താവനയും മാധ്യമവാർത്തകളെ സ്ഥിരീകരിക്കുന്നവ ആയിരുന്നു. എനിക്കും നല്ലവരായ പോലീസ് സുഹൃത്തുക്കൾ ഉണ്ട്. അതോടൊപ്പം തന്നെ, സാമൂഹ്യ പ്രതിബദ്ധതയോടെ ചില കാര്യങ്ങൾ ചെയ്യാനൊരുങ്ങിയപ്പോൾ ചില പോലീസുകാരിൽ നിന്ന് ചവർക്കുന്ന അനുഭവങ്ങളും ഉണ്ടായിട്ടുണ്ട്. ട്രാഫിക് ഡ്യൂട്ടിയിൽ നിൽക്കുന്ന പോലീസുകാരുടെ കയ്യിൽ നിന്ന് ഒരു കാരണവും കൂടാതെ പല വട്ടം തെറിയഭിഷേകം കിട്ടിയിട്ടുണ്ട്; എന്തിനാണെന്നോ ? ആ ഏമാന്മാർ പ്രതീക്ഷിക്കുന്ന സ്പീഡിൽ ഞാൻ വണ്ടി ഓടിക്കാഞ്ഞതിന്. വി ഐ പി വണ്ടികൾക്ക് അകമ്പടി പോകുന്ന പോലീസ് എന്തിനാണ് പൗരനെ തെറി വിളിക്കുന്നത് ? എറണാകുളത്ത് പാലാരിവട്ടത്ത് വച്ച് റോഡിന്റെ നടുക്ക് കയറി നിന്ന് പോലീസ് കൈ കാണിച്ച് മുന്നിൽ പോയ കാറ് പെട്ടെന്ന് നിർത്തുകയും തുടർന്ന് അതിന്റെ പിറകിൽ പോയി ബൈക്ക് ഇടിച്ച് എന്റെ ഒരു ബന്ധു കുഴപ്പത്തിലായതും ഓർത്താൽ കൊല്ലം സംഭവവുമായി നേരിട്ട് ബന്ധപ്പെടുത്താം.യൂണിഫോം ഇട്ട എല്ലാ വിഭാഗങ്ങളുടെയും ഒരു ഗതി കേടുണ്ട്. ഒരാൾ കാണിക്കുന്ന മോശം കാര്യത്തിനും ആ കുപ്പായം ഇട്ട മറ്റുള്ളവരും അടച്ചു പഴി കേൾക്കും. അത് പൊലീസോ പട്ടാളമോ വക്കീലോ പള്ളീലച്ചനോ കന്യാസ്ത്രീയോ ആരായാലും....അതിനാൽ കുറ്റം ചെയ്യുന്നവരെ ന്യായീകരിക്കാതെ നിയമത്തിന്റെ കൈകളിൽ വിട്ടു കൊടുക്കുകയാവും ഭൂരിഭാഗത്തിന് നല്ലത്.

      Delete
    2. പോലിസ് ഏറ്റവുമധികം നിരീക്ഷണവിധേയമായ സർവീസ് തന്നെ...ജനങ്ങളെ ദിനേന നേരിട്ട് പരിചയിക്കുന്നതും... അതുകൊണ്ട് അവിടത്തെ പൊട്ടും പൊടിയും പെട്ടെന്ന് കണ്ണിൽ തടയും.... പോലിസിൽ ക്രിമിനലുകളുണ്ടെന്ന് ഒരു മാദ്ധ്യമം എഴുതുമ്പോൾ മനസ്സിലാക്കണം കുടുംബവഴക്കിൽ പ്രതിയായ പോലിസുകാരെ കൂടി ചേർത്താണ് അതെന്ന്.... അല്ലാതെ ഒരു മാഫിയ ആയി അവർ പ്രവർത്തിക്കുന്നതു കൊണ്ടല്ല... മാഫിയ എന്ന വാക്ക് വിശാലമായ അർത്ഥത്തിൽ സമൂഹത്തെക്കുറിച്ച് ചിന്തിക്കാൻ വേണ്ടി തന്നെ ഓർമിപ്പിച്ചതാണ്... മാദ്ധ്യമങ്ങൾ ഒരിക്കലും പോലിസിനെ അനുകൂലിച്ച് വാർത്ത കൊടുക്കാറില്ല..അതിനു ന്യൂസ് വാല്യൂ ഇല്ല... പ്രമുഖന്മാരുടെ പോക്രിത്തരങ്ങൾ മുക്കുന്ന പ്രമുഖ പത്രങ്ങൾ പോലും ഒരു സീരിയൽ തിരക്കഥ ഒരുക്കി പോലിസിനെതിരെ ജനവികാരം തിരിച്ചു വിടുന്നത് കാണാം.... കമ്യൂണിസ്റ്റിനെയും പോലിസിനെയും ജന്മശത്രുക്കളായി പ്രഖ്യാപിച്ച്ട്ടുള്ള മാദ്ധ്യമ മാഫിയകൾ പോലുമുള്ളിടത്ത് പൊലിസിംഗ് നടത്തി രക്ഷപെടാൻ ഭാഗ്യം കൂടി വേണം.. ഇന്നലത്തെ സംഭവത്തിലെ ശരിക്കുമുള്ള ഇര ആ പോലിസുകാരൻ തന്നെ... ഒരു ആക്സിഡൻറിനെ തിരക്കഥ ഒരുക്കി പോലിസിനു നേരെ തിരിച്ചു വിട്ട മാദ്ധ്യമപിമ്പിംഗ്....

      Delete
    3. ഞാൻ കൊല്ലം സംഭവം മാത്രം ആധാരമാക്കിയല്ല ഈ വിഷയത്തെ സമീപിച്ചത്. കൊല്ലം സംഭവം ഒരു ഉദാഹരണം മാത്രമാണ്. കൊല്ലം സംഭവത്തെ പറ്റി ഇന്ന് കൂടുതൽ വാർത്തകൾ ഉണ്ട്. നിർത്താതെ പോയ ബൈക്കിലിരുന്ന ആളുടെ തല തടഞ്ഞ പോലീസുകാരന്റെ കയ്യിൽ ഇരുന്ന വാക്കി ടോക്കിയിൽ ഇടിച്ച് ആന്തരിക രക്തസ്രാവം ഉണ്ടാകാൻ പാകത്തിന് പരിക്ക് പറ്റണമെങ്കിൽ ആ വണ്ടിയുടെ സ്പീഡും വാക്കി ടോക്കി പിടിച്ചിരുന്ന ഉദ്യോഗസ്ഥന്റെ ആരോഗ്യവും ഉയരവും എല്ലാം കൂടി അങ്ങ് സിങ്ക് ആവുന്നില്ല. എന്തോ, എന്റെ ഇമാജിനേഷൻ കപ്പാസിറ്റിയുടെ കുറവായിരിക്കും. മൊത്തം പോലീസ് സേനയുടെ ദൈനം ദിന സേവനങ്ങളും കഷ്ടപ്പാടുകളും ഒന്നും ഞാൻ നിസ്സാരവൽക്കരിക്കുന്നില്ല. അവർ ചെയ്യുന്ന സേവനങ്ങൾ എല്ലാം സ്തുത്യർഹവും മഹനീയവും തന്നെയാണ്. പക്ഷെ, ആ സേനയെ മൊത്തം നാറ്റിക്കാൻ പറ്റിയ നിസ്സാര പുഴുക്കുത്തുകളെ കണ്ടെത്തി തിരുത്തേണ്ടത് അനിവാര്യം തന്നെയാണ്. അല്ലാതെ, ഒറ്റപ്പെട്ട മോശം സംഭവങ്ങൾ വരുമ്പോൾ വർഗ്ഗബോധം മൂത്ത് തലയിൽ ഓളം വെട്ട് തുടങ്ങിയാൽ പിന്നെ തരവഴി കാണിച്ചവനെ ചുമലിലേറ്റുന്നവർ ഒക്കെ നാറും. ചത്ത ഒറ്റ ഈച്ച വീണാൽ മതി ഒരു കുടം വീഞ്ഞ് മൊത്തം ചീത്തയാവാൻ. പിന്നെ, പോലീസ് മാഫിയ ആണെന്ന് ഒക്കെ പറഞ്ഞാൽ സമ്മതിക്കാൻ തലയ്ക്കു വെളിവുള്ള ആരും വരുമെന്ന് എനിക്കും തോന്നുന്നില്ല. മോശം സംഭവങ്ങൾ എല്ലാം ഒറ്റപ്പെട്ടത് തന്നെയായി കാണാനാണ് എനിക്കും ഇഷ്ടം. പക്ഷെ ഒറ്റപ്പെട്ട സംഭവങ്ങളുടെ എണ്ണം ഏറിവന്നാൽ അതിന്റെ ഒറ്റപ്പെട്ടത് എന്ന് കാണാൻ യുക്തി അനുവദിക്കില്ല എന്ന സത്യം അവശേഷിക്കുന്നു.

      Delete
  2. ഒറ്റപ്പെ്ടട ഇത്തരം സംഭവങ്ങള്‍ ഏറിവരുന്നു എന്തു തന്നെയാണ് നാം ഈ ഭരണത്തിലും ഭയക്കേണ്ടത്..

    ReplyDelete
  3. സർക്കാർ ഏത് തന്നെയായാലും ചില പോലീസുകാരുടെ സ്വഭാവത്തിന് ഒരു മാറ്റവും സംഭവിക്കാൻ പോകുന്നില്ല.

    ReplyDelete