338 ബീവറേജ് ഔട്ട്ലറ്റുകള്ക്ക് മുമ്പില് ഓരോ ദിവസവും ക്യൂ നില്ക്കുന്നത് 12 ലക്ഷം ഉപഭോക്താക്കളാണത്രേ. 28 കോടി രൂപയുടെ മദ്യം ഓരോ ദിവസവും ബീവറേജസ് കോര്പ്പറേഷന് മാത്രം വില്ക്കുന്നുണ്ടത്രേ. കേരളത്തില് നടക്കുന്ന കൊലപാതകങ്ങളില് മുക്കാല് ഭാഗത്തോളം മദ്യലഹരിയില് ആണത്രേ സംഭവിക്കുന്നത്. ദേശീയ പാതയില് നടക്കുന്ന റോഡപകടങ്ങളില് പകുതിയിലധികവും മദ്യം കൂടി പ്രതി സ്ഥാനത്ത് നില്ക്കുന്നവയാണെന്നും നെറ്റിലെവിടെയോ കണ്ടു. മദ്യത്തിന് വേണ്ടി 15000 കോടി രൂപ ചിലവാക്കുന്ന മലയാളികള് അരിക്ക് വേണ്ടി 3500 കോടി രൂപ മാത്രമാണ് ചിലവാക്കുന്നത് പോലും. സര്ക്കാര് തന്നെ മദ്യം വില്ക്കുന്ന ലോകത്തിലെ ഏക ഭൂപ്രദേശമാണ് കേരളം എന്നതാണ് സൈബര് സ്പേസില് കണ്ട മറ്റൊരു നിരീക്ഷണം. മദ്യത്തില് നിന്നുണ്ടാകുന്ന വരുമാനത്തേക്കാള് മദ്യപാന ജന്യരോഗചികിത്സക്ക് വേണ്ടി ചിലവാക്കുന്ന സ്ഥലമാണ് കേരളം എന്ന് മറ്റൊരു കണ്ടെത്തല്. ഒരു കലോറി പോലും ഊര്ജ്ജം പ്രദാനം ചെയ്യാത്ത ഈ പാനീയം കഴിച്ചാല് കഴിക്കുന്ന ആളുടെ തലച്ചോറിന്റെ പ്രവര്ത്തനരീതി മൃഗത്തിന്റെത് പോലെ ആയിത്തീരും എന്നതാണ് ഏറ്റവും രസകരമായി തോന്നിയ നിരീക്ഷണം. ഏറ്റവും അവസാനം കേട്ട തമാശ കോടിക്കണക്കിനു രൂപയുടെ മദ്യം ജനങ്ങള്ക്ക് വേണ്ടി വില്ക്കുന്ന ഗവണ്മെന്റ് തന്നെ 20 ലക്ഷത്തോളം രൂപ ചിലവാക്കി ഒരു വിദഗ്ദ്ധസമിതിയെ നിയോഗിച്ചിരിക്കുന്നു. എന്തിനാനെന്നല്ലേ; മദ്യപാനം സമൂഹത്തിലും വ്യക്തിയിലും കുടുംബത്തിലും ആരോഗ്യത്തിലും വരുത്തുന്ന ദോഷഫലങ്ങള് സമഗ്രമായി പഠിക്കാന് !! ഒരു മണിക്കൂര് ഗൂഗിള് ചെയ്താല് കിട്ടാവുന്ന വിവരങ്ങളാണിത്... ഹാ..സര്ക്കാര് പണം ചിലവഴിക്കാന് ഓരോരുത്തര്ക്കും ഓരോ കാരണങ്ങള്...
ആശുപത്രിയിലാവട്ടെ റെയില്വേ സ്റ്റേഷനിലാവട്ടെ മാവേലി സ്റ്റോറിലാവട്ടെ ഏതു കൌണ്ടറില് ക്യൂ നിന്നാലും അസഹിഷ്ണുത കാണിക്കുന്ന മലയാളി യാതൊരു പരിഭവമില്ലാതെ ക്യൂനില്ക്കുന്ന സ്ഥാലമാണ് ബീവറേജ് കോര്പ്പറേഷന് ഔട്ട്ലറ്റുകള്. മികച്ച നിലവാരമുളള മദ്യം നല്കാനാണ് ബെവ്കോ ഔട്ട്ലെറ്റുകള് ആരംഭിച്ചതെങ്കിലും ഉദ്ദ്യോഗസ്ഥരുടെ ഒത്തുകളിയുടെ ഫലമായി നിലവാരമില്ലാത്തതും സര്ക്കാര് മുദ്രയില്ലാത്തതുമായ മദ്യം വ്യാപകമായി വില്ക്കുകയാണെന്നും ആരോപണമുണ്ട്. ഇത്തരത്തില് വില്ക്കുന്ന മദ്യത്തിന് ബില്ല് നല്കാറില്ലത്രേ. കന്നുകാലികളെ പോലെയാണ് മദ്യ ഉപഭോക്താക്കളെ സര്ക്കാര് കാണുന്നതെന്ന ഹൈക്കോടതി വിമര്ശനത്തിന്റെ വെളിച്ചത്തില് ബെവ്കോയുടെ നിലവാരം ഉയര്ത്താനുളള പ്രവര്ത്തനങ്ങള് സര്ക്കാര് തുടങ്ങിക്കഴിഞ്ഞു എന്നാണറിഞ്ഞത്. ലക്ഷക്കണക്കിന് ഉപഭോക്താക്കള് ബെവ്കോയുടെ മുമ്പില് ക്യൂ നില്ക്കുമ്പോള് നഷ്ടപ്പെടുന്ന ക്രിയാത്മകമായി വിനിയോഗിക്കപ്പെടേണ്ട സമയം ലാഭിക്കാന് വേണ്ടി നിലവിലുളള ഔട്ട്ലെറ്റുകളില് രണ്ടോ മൂന്നോ കൗണ്ടറുകള് കൂടി ആരംഭിക്കാനും അത് വഴി ക്യൂ കുറയ്ക്കുന്നതിനും സര്ക്കാര് ആലോചിക്കുന്നുണ്ട്. ഇത് താന് ഡാ ഗവണ്മെന്റ്....ജനങ്ങള്ക്ക് ആനന്ദ ലബ്ദിക്കിനിയെന്തു വേണം....
മേല്പ്പറഞ്ഞ ഭൂരിപക്ഷ മധ്യ ഉപഭോക്താകളുടെ അത്രയും മാര്ക്കറ്റ് ഷേര് വരില്ലെങ്കിലും മദ്യക്കച്ചവടം നടത്തുന്ന വേറെയും വിഭാഗങ്ങളുണ്ട് ഈ നാട്ടില്. ബാറുകള്, മിലിട്ടറി ക്വോട്ട മറിച്ചു വില്ക്കുന്ന പട്ടാളക്കാര്, ചെറിയ തോതില് ചാരായം വാറ്റി വില്ക്കുന്നവര്, ബെവ്കോയില് നിന്ന് കുപ്പിക്കണക്കിനു വാങ്ങി ചില്ലറ വില്പ്പന നടത്തുന്നവര് അങ്ങനെ പോകുന്നു ലിസ്റ്റ്. കള്ളിനെ മദ്യമായി കണക്കാക്കാം എങ്കില് കള്ള് ഷാപ്പും പെടും ഇതില്.
"മദ്യ" കേരളത്തിലെ ഇപ്പോഴത്തെ പ്രശ്നം എന്താണെന്നു വച്ചാല്, മദ്യം വിതരണം ചെയ്യുന്ന എല്ലാ ഇടങ്ങളുടെയും നിലവാരം ഉയര്ത്തണം എന്നതല്ല. അടച്ചിട്ട 418 ബാറുകളുടെ നിലവാരത്തെ സംബന്ധിച്ചിട്ടുള്ളതാണ്. എന്തായാലും ഈ നിലപാടിന്റെ പേരില് സ്ത്രീകളുടെയും മദ്യനിരോധന-മദ്യവർജന പ്രസ്ഥാനത്തിന്റെ നേതാക്കളുടെയും ഇടയില് അദ്ദേഹം ഉണ്ടാക്കിയ മൈലേജ് ചില്ലറയല്ല. എന്നാൽ അതേ സമയം തന്നെ ബാർ ഉടമകളുമായി കച്ചവടം ഉറപ്പിക്കുന്നതിന് കോൺഗ്രസിലെ ഒരു വിഭാഗം ഉറക്കമിളയ്ക്കുകയായിരുന്നു എന്ന് പൊതുജനം സംശയിച്ചാല് അവരെ തെറ്റ് പറയാന് പറ്റില്ല. ഇതിനു വേണ്ടി കൈമാറ്റം ചെയ്യപ്പെട്ടത് കോടികളായിരിക്കുമെന്നു മദ്യലോബിയെയും നമ്മുടെ രാഷ്ട്രീയക്കാരെയും അറിയാവുന്നവരെല്ലാം വിശ്വസിക്കുന്നു. ഒരു വെള്ളമടി കമ്പനിയില് വന്നിരുന്നു അണ്ടിപ്പരിപ്പും ടച്ചിങ്ങ്സും കോളയും മാത്രം അകത്താക്കുന്ന ആളെപ്പോലെയാണ് കെ പീ സീ സീ പെരുമാറുന്നത് എന്ന ആക്ഷേപം ആ പാര്ട്ടിയിലെ പലര്ക്കും ഉണ്ട്. ഉമ്മന് ചാണ്ടി മുതല് ആദര്ശത്തിന്റെ മറ്റൊരു ഹരിത മുഖമെന്ന് കൊട്ടിഘോഷിക്കുന്ന കെപിസിസി വൈസ് പ്രസിഡന്റ് വിഡി സതീശന് വരെ സുധീരനെ പല രീതിയില് തള്ളിപ്പറഞ്ഞു. എങ്കിലും അടച്ച ബാറുകള് തുറക്കാന് സുധീരന് സമ്മതിച്ചില്ല. കോണ്ഗ്രസിന്റെ മിക്കവാറും നേതാക്കളും മദ്യലോബിക്കൊപ്പമാണെന്നു ജനം വിശ്വസിച്ചു കഴിഞ്ഞു. രസകരമായ കാര്യം പഴയ ഹരിത എം എല് എ മാരില് കുറെ പേര് മദ്യവിരുദ്ധ ഗ്രൂപ്പിലും ബാക്കി മദ്യഅനുകൂല ഗ്രൂപ്പിലും ആയി എന്നതാണ്. ഇങ്ങനെ മദ്യ ലോബിയും മന്ത്രിമാരും ഗ്രൂപ്പ് മറന്ന് എല്ലാ നേതാക്കളും സുധീരനെതിരെ ഒന്നിക്കുമ്പോള് സുധീരനെ സംരക്ഷിക്കാന് കുറച്ചു സാധാരണ കോണ്ഗ്രസ് പ്രവര്ത്തകരും രാഷ്ട്രീയത്തിനതീതമായി ചിന്തിക്കുന്ന കുറച്ചു ജനങ്ങളും മാത്രം. ഇക്കാര്യത്തില് ഘടകകക്ഷികളും പല തട്ടിലാണെന്നുള്ളതാണ് അതീവ രസകരം.
ഇതിലും കഷ്ടമാണ് ഇക്കാര്യത്തില് ജുഡീഷ്യറിയുടെ അവസ്ഥ. ബാർലൈസൻസ് കേസ് പരിശോധിച്ച ഹൈക്കോടതി ജഡ്ജി വിധിപ്രസ്താവന എഴുതി പൂർത്തിയാക്കി അത് കോടതിയിൽ വായിക്കാൻ കുറച്ചു മണിക്കൂറുകൾ മാത്രം അവശേഷിക്കെ കേസില് നിന്ന് പിന്മാറിയത് സംസ്ഥാനത്താകെ വലിയ ചർച്ചാ വിഷയമായിരിന്നു. സംസ്ഥാനത്തിന്റെ നീതിന്യായ ചരിത്രത്തിൽ മുന്പെങ്ങും കേള്ക്കാത്ത ഒരു സംഭവമായിരുന്നു ഇത്. കേസ് കേൾക്കുന്നതിൽ നിന്നും വിധി പറയുന്നതിൽ നിന്നും ജഡ്ജിമാർ പിന്മാറിയ സംഭവങ്ങൾ ഇതിനുമുമ്പും ഉണ്ടായിട്ടുണ്ട്. എന്നാൽ അതിന്റെ കാരണങ്ങൾ ഇത്രയും വിശദമായി രേഖപ്പെടുത്തി ഒരു ജഡ്ജി പിന്മാറുന്നത് ഇതാദ്യമാണ്. ബാർ ഉടമകളുടെ പ്രതിനിധിയായി ഒരു അഭിഭാഷകൻ തന്റെ വീട്ടിൽ വന്നു കണ്ട് സ്വാധീനിക്കാൻ ശ്രമിച്ചുവെന്നു ഉത്തരവിൽ രേഖപ്പെടുത്തിക്കൊണ്ടാണ് ജസ്റ്റിസ് സി ടി രവികുമാർ പിന്മാറ്റം പ്രഖ്യാപിച്ചത്. ആ അഭിഭാഷകന്റെ പേര് പോലും അദ്ദേഹം വെളിപെടുത്തിയിരുന്നു. നീതിന്യായവ്യവസ്ഥയോടും സുതാര്യഭരണത്തോടുമെല്ലാം കള്ളു കച്ചവടക്കാർക്കുള്ള സമീപനത്തിന്റെ നിലവാരമാണ് ഇതില് നിന്നെല്ലാം കാണാന് കഴിയുന്നത്.
ഇനിയുള്ളത് ഈ വിഷയത്തില് സമൂഹത്തിന്റെ കാഴ്ചപ്പാടുകളാണ്. മദ്യം നമുക്കെന്നും ഒരു കപട സദാചാര വിഷയമാണ്. മദ്യം സംബന്ധിച്ച പല തരം നിലപാടുകള് മനുഷ്യചരിത്രത്തോളം തന്നെ പഴക്കമുള്ളവയാണ്. ഒട്ടു മിക്ക മാനവ സംസ്കാരങ്ങളിലും പലവിധത്തിലുള്ള മദ്യങ്ങള് സുലഭമായി ഉപയോഗിച്ചിരുന്നു. മദ്യപാനം ഒരു പാപമായി അവിടങ്ങളിലെ മതങ്ങളോ അധികാരികളോ കണക്കാക്കിയിരുന്നുമില്ല. സമ്പൂര്ണമായ മദ്യനിരോധനം ഇസ്ലാമിലൊഴികെ മറ്റു പ്രമുഖ മതങ്ങളിലൊന്നും ഉണ്ടെന്നു തോന്നുന്നില്ല. മദ്യപാനം ആത്മീയതയുടെ ഭാഗമാക്കിയിരുന്ന പല സമൂഹങ്ങളും നില നിന്നിരുന്നു.
പടിഞ്ഞാറന് രാജ്യങ്ങളിലും നമ്മുടെ പല അയല്രാജ്യങ്ങളിലും സാധാരണ സൂപ്പര്മാര്ക്കറ്റുകള് വഴി പോലും മദ്യം ലഭിക്കും. ഇവിടങ്ങളില് ഒന്നും തന്നെ ഒരു തരത്തിലും മദ്യം ഒരു സാമൂഹിക പ്രശ്നം ആകുന്നില്ല. ജനമാണ് മദ്യം വേണമോ വേണ്ടയോ എന്ന് തീരുമാനിക്കേണ്ടത്. മദ്യത്തിന്റെ ലഭ്യത കുറച്ചാല് മദ്യപാനം കുറയുമെന്ന് പറയുന്നത് ഒരു പഠനത്തിന്റെയും അനുഭവത്തിന്റെയും അടിസ്ഥാനത്തിലല്ല. അതൊരു കപട ധാര്മ്മിക മനോഭാവമാണ്. മദ്യം നിരോധിച്ച് നമ്മള് സാന്മാര്ഗികതയുടെ ഭാഗത്താണെന്ന് കാണിക്കുക; അത്ര തന്നെ. അത് മതപ്രചാരകര്ക്കും സന്മാര്ഗപ്രചാരകര്ക്കും ചേരും, പക്ഷേ ഭരണാധികാരികള്ക്ക് ചേരുമെന്ന് തോന്നുന്നില്ല. മദ്യം പൂര്ണ്ണമായി നിരോധിച്ചാലും ആവശ്യമുള്ളവര് അത് സംഘടിപ്പിക്കും. സര്ക്കാര് തലത്തില് നടത്താവുന്നത് പരമാവധി ബോധവല്ക്കരണമാണ്. മദ്യം കുടിക്കണോ ? എത്ര കുടിക്കണം ? അതില് എത്ര നിയന്ത്രണങ്ങള് വേണം ? എന്നൊക്കെയുള്ളത് ആരോഗ്യത്തിന്റെയും ക്രമസമാധാനത്തിന്റെയും പൊതു സുരക്ഷയുടെയും വിഷയങ്ങളായി പരിഗണിക്കുന്നതാണ് ആധുനികസമൂഹം എന്ന നിലയില് നമുക്ക് നല്ലത്. സദാചാരത്തിന്റെയും ധാര്മികതയുടെയും നിലയില് വ്യക്തികള് അതിനെ കാണട്ടെ. മദ്യം ഉപയോഗിക്കുന്നതിനും കൈകാര്യം ചെയ്യുന്നതിനുമുള്ള പ്രായപരിധി, അമിതമായി മദ്യപിച്ചു വണ്ടിയോടിക്കുക, മദ്യപിച്ചു പൊതുസ്ഥലത്ത് ബഹളമുണ്ടാക്കുക, ഓഫീസുകളിലും സ്കൂളുകളിലും കോളേജുകളിലും മദ്യപിച്ചു വരിക മുതലായ കാര്യങ്ങളെ ഗൌരവമായി കണ്ടു അവയുടെ ലംഘനങ്ങള്ക്ക് മാതൃകാപരമായ ശിക്ഷ നല്കാന് സര്ക്കാര് മുന്കൈ എടുക്കണം. ഇവിടെ ഏതു കൊച്ചു കുട്ടിക്കും മദ്യം വാങ്ങാം, മുന്തിയ ബാറിന്റെ മുന്പില് ഒരു പോലീസുകാരനും ഊതിക്കാന് നില്ക്കില്ല...പിന്നെന്ത് വേണം...
ഈ ബ്ലോഗിലെ പുതിയ പോസ്റ്റുകള് ലഭിക്കാന് താഴെയുള്ള ലിങ്കില് ക്ലിക്ക് ചെയ്തിട്ടു ആ ഫേസ്ബുക്ക് പേജ് ലൈക് ചെയ്യുക
അല്ലെങ്കില് താഴെയുള്ള ലിങ്കില് ക്ലിക്ക് ചെയ്തിട്ടു ആ ഫേസ്ബുക്ക് ഗ്രൂപ്പില് ജോയിന് ചെയ്യുക
