ഞാൻ വെറും പോഴൻ

My photo

മിക്കവാറും എല്ലാ മതങ്ങളും പറയുന്നു, ദൈവത്തെപ്പോലെയാവാന്‍. എന്നാല്‍ ഞാന്‍ നല്ലൊരു മനുഷ്യന്‍ പോലും അല്ല..
ആര്‍ക്കെങ്കിലും ഞാനൊരു നല്ല മനുഷ്യനായി തോന്നിയാല്‍ അത് അവരുടെ മാത്രം കാഴ്ചപ്പാടാണ്. അതിനു ഞാന്‍ ഉത്തരവാദിയല്ല.....

Thursday, 14 June 2018

സഭാ സംവിധാനങ്ങളിൽ വിശ്വാസികൾക്ക് നഷ്ടപ്പെട്ടു കൊണ്ടിരിക്കുന്ന വിശ്വാസം എങ്ങനെ വീണ്ടെടുക്കും !!???

രൂപതയുടെ സ്വത്ത് കര്‍ദ്ദിനാളിന് (ഒരു വ്യക്തിക്ക്) എങ്ങനെ വില്‍ക്കാനാകുമെന്ന ഹൈക്കോടതിയുടെ ചോദ്യത്തിന് വല്യ പിതാവിന്റെ മറുപടിയായായിരുന്നു  കിടിലൻ. സഭയുടെ സ്വത്ത് പൊതുസ്വത്തല്ലെന്നും അത് വില്‍ക്കുന്നത് മൂന്നാമത് ഒരാള്‍ക്ക് ചോദ്യം ചെയ്യാനാവില്ലെന്നും പിതാവ് അദ്ദേഹത്തിന്റെ അഭിഭാഷകൻ മുഖേന വിശദീകരിച്ചു. നാട്ടുഭാഷയിൽ പറഞ്ഞാൽ, പുത്തനുള്ളവന്റെ വീട്ടിൽ ചാത്തം നടത്തുന്നതിന് പിച്ചക്കാര് ചുമ്മാ തമ്മിൽ തല്ലേണ്ടെന്ന്.... ഭൂമിയുടെ അവകാശം സംബന്ധിച്ച രേഖകള്‍ പരിശോധിക്കേണ്ടതുണ്ടെന്ന് നിരീക്ഷിച്ച കോടതി ഇക്കാര്യത്തില്‍ സര്‍ക്കാരിന്റെ വിശദീകരണം തേടി. സഭയുടെ ഭൂമി ഇടപാട് കേസിൽ നടപടികളിൽ അമാന്തം വരുത്തിയ മജിസ്ട്രേറ്റ് കോടതിയെയും ഹൈക്കോടതി വിമര്‍ശിച്ചു. കേസ് നീതിപീഠത്തിന്റെ പല പടികൾ കടന്ന് പരമോന്നതനീതിപീഠത്തിന് മുൻപിൽ എത്തിപ്പെട്ടിരിക്കുന്നു. 

പിതാക്കന്മാരും സഭാധികാരികളും നാഴികയ്ക്ക് നാൽപ്പത് വട്ടം "നമ്മുടെ" സ്ഥാപനങ്ങൾ, "നമ്മുടെ" സ്വത്ത് എന്നൊക്കെ ആവർത്തിക്കാറുണ്ടെങ്കിലും സീറോ മലബാർ സഭയുടെ  സ്വത്തിൽ വിശ്വാസികൾക്ക് ഒരു തരിമ്പും അവകാശമില്ല എന്നറിയാവുന്നവരാണ് ഭൂരിഭാഗം വിശ്വാസികളും. ആ തിരിച്ചറിവിൽ നിൽക്കുമ്പോൾ പോലും ഉത്തരം കിട്ടേണ്ട ചോദ്യങ്ങൾ നിരവധിയാണ്; 

മെത്രാന് സ്വന്തം ഇഷ്ടത്തിനനുസരിച്ച് സഭയുടെ സ്വത്തുവകകൾ സ്വകാര്യ സ്വത്ത് പോലെ വിൽപ്പന നടത്താൻ പറ്റുമോ ? 

യഥാർത്ഥത്തിൽ ഭൂമി വിറ്റത് എത്ര രൂപയ്ക്കാണ്? 

ആധാരത്തിൽ കാണിച്ച തുകയും യാഥാർത്ഥവിലയും ഒന്നാണോ ?

മേൽ ചോദ്യത്തിന്റെ ഉത്തരം "അല്ല" എന്നാണെങ്കിൽ, യഥാർത്ഥത്തിൽ ഭൂമി വിറ്റ വിലയും ആധാരത്തിൽ കാണിച്ച തുകയും തമ്മിലുള്ള വ്യത്യാസത്തുക ഇപ്പോൾ ആരുടെ കയ്യിലാണ് ? 

ആധാരത്തിൽ വിലകുറച്ച് കാണിക്കുന്നതിലൂടെ ആദായ നികുതി, സ്റ്റാമ്പ് ഡ്യൂട്ടി, രജിസ്‌ട്രേഷൻ ഫീ തുടങ്ങിയവ വെട്ടിക്കുകയാണെന്നും അത് കൊണ്ട് തന്നെ ഇതൊരു കള്ളപ്പണ ഇടപാടാണെന്നും സത്യമായും അങ്ങേക്കറിയില്ലായിരുന്നോ ? 

ഉപദേശസമിതിയിലെ ആരും ഇക്കാര്യങ്ങളൊന്നും ചൂണ്ടിക്കാട്ടിയില്ലേ ?

വിശ്വാസികൾ അതിരൂപതയിലെ അംഗങ്ങളല്ലെന്ന് ബോധിപ്പിക്കുമ്പോൾ
സത്യത്തിൽ അല്മായർ സഭയിൽ ആരാണ് ?   

അങ്ങനെ ചെയ്‌താൽ ഈ സ്വത്തൊക്കെ ആർജ്ജിക്കാനായി പണം കൊടുത്ത അല്മായർക്ക് നിസഹായരായി നോക്കി നിൽക്കാനേ പറ്റുകയുള്ളൊ ?

രൂപതയുടെ പാൻ നമ്പർ ട്രസ്റ്റിന്റേതാണെങ്കിൽ പിന്നെ ഇത് ട്രസ്റ്റല്ല എന്ന് അവകാശപ്പെടുന്നതെങ്ങിനെയാണ് ?

പാൻ നമ്പർ പ്രകാരം ട്രസ്റ്റായത്‌ കൊണ്ട്, രൂപത ട്രസ്റ്റല്ലേ എന്ന ജഡ്ജിയുടെ ചോദ്യത്തിന് മറുപടിയായി "ടാക്സ് ഇളവുകൾക്ക് വേണ്ടിയായിരുന്നു" ട്രസ്റ്റായി രജിസ്റ്റർ ചെയ്തത് എന്ന് ബോധിപ്പിക്കുമ്പോൾ പൊതുജനം മനസിലാക്കേണ്ടത് എന്താണ് ? 

നികുതി ഇളവിന് വേണ്ടി വസ്തുതാ വിരുദ്ധമായി പ്രവർത്തിക്കുന്നതിൽ തെറ്റില്ല എന്നാണോ ?

പബ്ലിക് ട്രസ്റ്റ് എന്ന നിലയിൽ നികുതി ആനുകൂല്യങ്ങൾ കൈപ്പറ്റുമ്പോൾ അല്മായരോട് മാത്രമല്ല പൊതുസമൂഹത്തി(General Public)നോട് പോലും രൂപതയ്ക്ക് നിയമപരമായ ബാധ്യത ഇല്ലേ ?

ഭൂമിയിടപാടിൽ വീഴ്ചകൾ പറ്റിയിട്ടുണ്ട്; നഷ്ടം നികത്തിക്കൊള്ളാം എന്നൊക്കെ പറയുമ്പോൾ എന്താണ് വിശ്വാസികൾ മനസിലാക്കേണ്ടത് ?

ഇനി ഭൂമിയിടപാടിൽ പിതാവ് നിരപരാധി ആണെങ്കിൽ, ഞാനൊരു തെറ്റും ചെയ്‌തിട്ടില്ല; ഏതന്വേഷണത്തെയും നേരിടാൻ തയ്യാറാണെന്ന് വ്യക്തമായ ഭാഷയിൽ പറയാൻ പിതാവെന്തിനാണ് മടിക്കുന്നത് !??


ഭൂമിയിടപാടിൽ പിതാവിന്റെ നിരപരാധിത്വത്തിൽ പിതാവിന് സംശയമില്ലാത്തിടത്തോളം, വിമതവൈദികരും ചില അല്മായരും ചേർന്ന് പ്രചരിപ്പിക്കുന്നതെല്ലാം സത്യവിരുദ്ധവും കടുത്ത അനീതിയും ആയിരിക്കണം. അപ്പോൾ അവർക്കെതിരെ ശിക്ഷണ നടപടികളോ ശിക്ഷാ നടപടികളോ കേവലം ഒരു താക്കീത് പോലുമോ കൊടുക്കാത്തതെന്താണ് !!???

കോടതിയിൽ പോലും കൃത്യമായി വിശദീകരിക്കാൻ കഴിയാതെ പോകുന്നത്ര സങ്കീർണ്ണത നിറഞ്ഞ റിയൽ എസ്റ്റേറ്റ് ഇടപാടുകളിൽ കൃത്രിമങ്ങൾ നടന്നിട്ടില്ല എന്ന് എന്ത് കൊണ്ടാണ് അല്മായർ വിശ്വസിക്കേണ്ടത് ?

തനിക്കുണ്ട് എന്നവകാശപ്പെടുന്ന "സ്വകാര്യ സ്വാതന്ത്ര്യ പ്രിവിലേജ്"-ന്റെ ബലത്തിൽ നടന്ന ഈ ഇടപാടുകളുടെ പുറത്ത് സ്റ്റാമ്പ് ഡ്യൂട്ടി, ആദായ നികുതി, റെവന്യൂ എൻഫോഴ്‌സ്‌മെന്റ് തുടങ്ങിയ വകുപ്പുകളിൽ നിന്ന് നടപടിയും സാമ്പത്തികബാധ്യതയും വന്നാൽ അതും രൂപതയിൽ നിന്നായിരിക്കില്ലേ ചിലവാക്കുക ? 

അപ്പോഴും തനിക്കെതിരെ നടപടി എടുക്കാൻ പോപ്പിന് മാത്രമേ കഴിയൂ എന്ന കാനോനയിലൂന്നി പ്രതിരോധം തീർക്കാൻ പറ്റുമോ ?

കാനോന്‍ നിയമം സഭയുടെ ആഭ്യന്തരകാര്യങ്ങള്‍ക്ക് മാത്രമാണ് ബാധകമായിട്ടുള്ളത് എന്നിരിക്കെ, മാർപ്പാപ്പയ്ക്കല്ലാതെ മറ്റൊരാധികാര കേന്ദ്രത്തിനും തന്റെ മേൽ നിയന്ത്രണമില്ലെന്ന് അവകാശപ്പെടുന്ന പിതാവ് കൂടുതൽ നിയമനടപടികളും ദുരാരോപണങ്ങളും ക്ഷണിച്ച് വരുത്തുകയല്ലേ ?

ഈ ചോദ്യങ്ങളിൽ ചിലതിന് ഒരു പക്ഷെ, കോടതിയും സർക്കാരും നിയമസംവിധാനങ്ങളും ഒരു തീർപ്പ് കൽപ്പിക്കുമായിരിക്കും. എന്നാലും ഉത്തരമില്ലാതെ പോകാൻ സാധ്യതയുള്ള കുറെ ചോദ്യങ്ങൾ ബാക്കിയാകാനാണ് സാധ്യത. 

എന്തായാലും പിതാവിന്റെ ഈ വെളിപ്പെടുത്തലിലൂടെ മനസിലാവുന്ന കാര്യം ഇതല്ലെ ?; "നമ്മുടെ" സ്ഥാപനങ്ങൾ, "നമ്മുടെ" സ്വത്ത് എന്നൊക്കെ പറയുന്നതിലെ "നാം" എന്നത് നമ്മൾ എന്ന Collective Pronoun അല്ല എന്നും മറിച്ച് "എന്റെ" എന്നതിന്റെ പൂജക ബഹുവചനം ആണെന്നുമല്ലേ ? പണ്ടൊക്കെ ഫ്യൂഡൽ നാടുവാഴികളും പ്രഭുക്കളും ഉപയോഗിച്ചിരുന്ന "നോം", "നാം", "നമ്മൾ" "നമ്മുടെ" എന്നൊക്കെ അർത്ഥം വരുന്ന അതേ പ്രയോഗം തന്നെയല്ലേ ഇതും.... 

അല്മായർക്ക്, "രൂപ-താ" എന്ന ആഹ്വാനം കേൾക്കുമ്പോൾ, ദൈവത്തിനെന്ന തെറ്റിദ്ധാരണയിലും വിശ്വാസത്തിലും രൂപ കൊടുക്കാനല്ലേ പറ്റൂ... സ്വത്ത് വാങ്ങുന്നതും വിൽക്കുന്നതും അല്മായരുടെ കൈപ്പിടിയിൽ ഉള്ള കാര്യമല്ലല്ലോ.....!!!!

രൂപത ട്രസ്റ്റ് അല്ല എന്നും അതിന്റെ പരമാധികാരി മെത്രാനാണെന്നും ഒക്കെയുള്ള വാദം നിയമദൃഷ്ട്യാ ശരിയാണെങ്കിൽ തന്നെ, വിശ്വാസികൾക്ക് സഭയിലും മെത്രാന്മാരിലും ഈ സംവിധാനങ്ങളിലും നഷ്ടപ്പെട്ടു കൊണ്ടിരിക്കുന്ന ട്രസ്റ്റ് ആര് വീണ്ടെടുക്കും !!???

ഈ ചോദ്യങ്ങൾക്കൊന്നും ഉത്തരം പറയാൻ തക്ക മനോഗുണം ശ്ലൈഹീകസിംഹാസനത്തിനില്ലാത്തതിനാൽ വിശ്വാസികൾക്ക് സഭയിലുള്ള തങ്ങളുടെ അവകാശങ്ങളെപ്പറ്റിയും രൂപതയിൽ തങ്ങൾക്കുള്ള സ്ഥാനത്തെപ്പറ്റിയും ഒരു ഏകദേശ ധാരണ കിട്ടിക്കാണുമെന്ന് വിശ്വസിക്കുന്നു. ആ സ്ഥിതിക്ക്  ഇനിയൊന്നും ചോദിക്കാതെ "Go To Your Classes"...

PS : ഒരു ക്രിസ്തൃാനിയെ സംബന്ധിച്ചിടത്തോളം ബൈബിൾ അനുസരിച്ച് രാജൃത്തിനുള്ള നികുതി കൊടുക്കാന്‍ ബാദ്ധ്യസ്ഥനാണ്. യേശുവിനെ കുടുക്കാന്‍ വേണ്ടി കൗശലക്കാരനായ ഒരു ശ്രേഷ്ഠ പുരോഹിതന്‍ “സീസറിന് നികുതി കൊടുക്കണമോ”എന്ന ചോദൃവുമായി യേശുവിനെ സമീപിച്ചു. ഒട്ടും ആലോചിക്കാതെ തന്നെ പ്രതിവചിച്ചു. “സീസറിനുള്ളത് സീസറിനും ദൈവത്തിനുള്ളത് ദൈവത്തിനും"...!!! ഈ ഉത്തരത്തിനു കൂടുതൽ വ്യാഖ്യാനത്തിന്റെ ഒന്നും ആവശ്യമില്ല. രാജ്യത്തിന്റെ നിയമം അനുസരിച്ചുള്ള നികുതി സത്യസന്ധമായി കൊടുക്കുക എന്ന് മാത്രമാണത്.

അത് ആദായ നികുതി ആയാലും സ്റ്റാമ്പ് ഡ്യൂട്ടി ആയാലും....

സന്മനസ്സുള്ളവർക്ക് സമാധാനം എന്നാണ് വചനം ...
സന്മനസ്സുള്ളവർക്ക് മാത്രം സമാധാനം എന്നും വായിക്കാം ....


ജോർജുകുട്ടി കിളിയന്തറയിൽ എന്നയാൾ ഫേസ്‌ബുക്കിൽ ഷെയർ ചെയ്ത ഒരു കഥ കൂടി... പ്രൊട്ടസ്റ്റന്റ് ദൈവശാസ്ത്രജ്ഞൻ കാൾ ബാർട്ട് പറഞ്ഞ ഒരു അനുഭവകഥയുണ്ട്. യുവപ്രായത്തിൽ സ്വിറ്റ്സർലണ്ടിലെ ഒരു ഗ്രാമത്തിൽ പാസ്റ്ററായിരുന്ന അദ്ദേഹം, തന്റെ ഇടവകയിലെ ഒരു വൃദ്ധരോഗിയെ കാണാൻപോയി. അയാൾ ഏതു പള്ളിയിലാണ് പോകുന്നതെന്ന് അന്വേഷിച്ച ബാർട്ടിനു കിട്ടിയ മറുപടി ഇതായിരുന്നു:-
"പാസ്റ്റർ ഞാൻ എന്നും സത്യസന്ധനായ മനുഷ്യനായിരുന്നു. ഒരിക്കലും പള്ളിയിൽ പോവുകയോ പോലീസ് കേസുകളിൽ പെടുകയോ ചെയ്തിട്ടില്ല.” 😄
അച്ചന്മാരും മെത്രാന്മാരുമൊക്കെ ചേരിതിരിഞ്ഞ് അടിവക്കുന്ന കേരളത്തിലും, പള്ളിയും പട്ടക്കാരുമൊന്നും മാന്യന്മാർക്കു ചേർന്നതല്ലെന്നു കുഞ്ഞാടുകൾക്കു തോന്നുന്ന കാലം വരുമോ?

ഈ ബ്ലോഗിലെ പുതിയ പോസ്റ്റുകള്‍ ലഭിക്കാന്‍ താഴെയുള്ള ലിങ്കില്‍ ക്ലിക്ക് ചെയ്തിട്ടു ആ ഫേസ്‌ബുക്ക് പേജ് ലൈക്‌ ചെയ്യുക


അല്ലെങ്കില്‍  താഴെയുള്ള ലിങ്കില്‍ ക്ലിക്ക് ചെയ്തിട്ടു ആ ഫേസ്‌ബുക്ക് ഗ്രൂപ്പില്‍ ജോയിന്‍ ചെയ്യുക

Friday, 8 June 2018

(കേരളത്തില്‍) എന്തിനോ വേണ്ടി തിളയ്ക്കുന്ന സാമ്പാര്‍......


Kick Off :           ലോകത്ത് ഏറ്റവുമധികം ജനങ്ങൾ കളിക്കുന്നതും ഇഷ്ടപ്പെടുന്നതും കാഴ്ചക്കാരുള്ളതുമായ കായിക വിനോദമേതാണ് എന്ന് ചോദിച്ചാല്‍ ഒരുത്തരമേ ഉണ്ടാകാന്‍ വഴിയുള്ളൂ. അത് ഫുട്ബോള്‍ ആണ്. അമിത മലയാള സ്നേഹത്താല്‍ നമുക്കതിനെ കാൽപന്തുകളി എന്ന് വിളിക്കാം. ഫുട്ബോള്‍ എന്ന പേരില്‍ അമേരിക്കയില്‍ മറ്റു ചില കളികള്‍ ഉള്ളതിനാല്‍ തെറ്റിദ്ധാരണ ഒഴിവാക്കാനായി അവര്‍ നമ്മുടെ കാല്‍പ്പന്തുകളിയെ സോക്കര്‍ എന്നാണ് പറയുന്നത്.  

First Half :  ഈ കളിയുടെ പ്രാകൃത രൂപങ്ങള്‍ ലോകത്തിന്റെ പല ഭാഗങ്ങളിലും പലതരത്തില്‍ പ്രചാരത്തിലിരുന്നു. ഏകദേശം 2500 വര്‍ഷങ്ങള്‍ക്കുമുമ്പ് ചൈനയില്‍ 'സുചു' എന്നപേരില്‍ ഫുട്ബോളിനോട് സാദൃശ്യമുള്ള ഒരു കളി ഉണ്ടായിരുന്നത്രേ. റോമന്‍ യുഗത്തില്‍ ഈ കളിയുടെ ആദിരൂപങ്ങള്‍ നിലനിന്നിരുന്നു എന്നും പറയപ്പെടുന്നു. വലിയ ഒരു പന്ത് ഉപയോഗിച്ച് കളിച്ചിരുന്ന 'എപ്പിസ്ക്കുറോസ്' എന്ന കളിയെപ്പറ്റി ഗ്രീക്ക് ചരിത്രവും പറയുന്നുണ്ട്. ഇറ്റലിയില്‍ നിലവിലിരുന്ന 'കാല്‍ചിയോ' എന്ന പന്തുകളിയെപ്പറ്റിയും രേഖയുണ്ട്. അങ്ങനെ ചരിത്രത്തിന്റെ താളുകള്‍ പിന്നോട്ടുമറിക്കുമ്പോള്‍ ഫുട്ബോള്‍ എന്ന കളിയുടെ പിറവിയെപ്പറ്റി പലവിധ കഥകള്‍ പ്രചാരത്തിലുണ്ട്.

Half Time :  ഭാവനാരഥത്തിലൂടെ ഒന്ന് സഞ്ചരിച്ചു നോക്കാം. ഏതോ ഒരാള്‍ ഏതോ ഒരു വസ്തു കാലുകൊണ്ടു തട്ടിത്തെറിപ്പിച്ചു കളിക്കുന്നു. അയാളെ തടഞ്ഞ് അത് കൈക്കലാക്കാന്‍ മറ്റൊരാളെത്തുന്നു. രണ്ടു പേര്‍ക്കും പിന്തുണയുമായി കുറച്ചു കൂടി ആളുകള്‍. അത് ഒരു മത്സരമായി മാറുന്നു. പിന്നീട് അത് ഒരു സ്ഥിരം വിനോദോപാധിയാകുന്നു. കാലക്രമത്തില്‍ ഏകീകൃത നിയമങ്ങളുമായി അത് ഫുട്ബോള്‍ എന്ന കളിയാകുന്നു. 

Second Half : എന്തായാലും ഗവേഷകര്‍ക്ക് ഈ കളിയെപ്പറ്റി സഹസ്രാബ്ദങ്ങളുടെ കഥ പറയാനുണ്ടെങ്കിലും സാധാരണക്കാരന്റെ നിത്യജീവിതത്തില്‍ ഈ കളി കടന്നുവന്ന് പ്രചുരപ്രചാരത്തിലായിട്ട് ഒന്നര നൂറ്റാണ്ട് ആവുന്നതേയുള്ളൂ. ഇക്കാലഘട്ടത്തിനിടക്ക് ഈ ജനപ്രിയ വിനോദമായ ഫുട്ബോളിന്റെ വളര്‍ച്ച എത്രയോ വേഗത്തിലും തീവ്രവും ആയിരുന്നു എന്നത് അതിശയിപ്പിക്കുന്നതാണ്. വ്യക്തികള്‍ക്കും ഗോത്രങ്ങള്‍ക്കും രാഷ്ട്രങ്ങള്‍ക്കും ഇത് ഒരു വികാരമാണിപ്പോള്‍. അതിനു രൂപത്തിനെ കവച്ചു വയ്ക്കുന്ന ഒരു മാസ്മര ജനകീയ ഭാവമാണുള്ളത്.  

Injury Time : ലോ­ക­മെ­മ്പാ­ടു­മു­ള്ള ഫു­ട്‌­ബോൾ ആ­രാ­ധ­ക­രു­ടെ നെ­ഞ്ചി­ടി­പ്പി­ന്‌ ആ­ക്കം കൂ­ട്ടി കാൽ­പ­ന്തു­ക­ളി­യു­ടെ വ­സ­ന്ത­കാ­ലം വന്നെത്തിക്കഴിഞ്ഞു. കാറ്റ് നിറച്ച ഈ തുകൽപ്പന്തിലേക്ക് ഒതുങ്ങാൻ ഇനി ഏതാനും ദിവസങ്ങൾ ബാക്കി. ഭൂമിയെ ഒരു ഫുട്ബോളായും രാജ്യങ്ങളെ ആ പന്തിലെ തുകൽക്കഷണങ്ങളായും സങ്കൽപ്പിച്ചാൽ അതിലെ ഏറ്റവും വലിയ തുകൽക്കഷണമായ റഷ്യയിലാണ് ഇത്തവണ ഫിഫ ലോകകപ്പ് മത്സരങ്ങൾ നടക്കുന്നത്. ഒരു കാലത്ത് ലോക രാഷ്ട്രീയം നിയന്ത്രിച്ചിരുന്ന സോവിയറ്റ് യൂണിയൻ എന്ന "സോഷ്യലിസ്റ്റ് സ്വപ്ന സാമ്രാജ്യം" പല രാജ്യങ്ങലായി ചിതറിപ്പോയി റഷ്യ എന്ന രണ്ടക്ഷരത്തിലൊതുങ്ങിയ ശേഷം ഈ ലോകത്തിനു മുന്നിൽ അവർ അഭിമാനപൂർവ്വം തലയുയർത്തിപ്പിടിച്ചു നടത്തുന്ന ഒരു ബൃഹത്ത് പരിപാടിയാണ് ഈ ലോകകപ്പ്. റഷ്യയിൽ എന്ന് മാത്രമല്ല കിഴക്കേ യൂറോപ്പിൽ തന്നെ ഇതാദ്യമായാണ് ഫുട്ബോൾ ലോകകപ്പ് നടക്കുന്നത്. ഒന്നിലധികം വൻ കരകളിലായി (യൂറോപ്പ്, ഏഷ്യ) നടക്കുന്ന ആദ്യ ഫുട്ബോൾ ലോകകപ്പും ഇത് തന്നെ. ഇറ്റലിയും ഹോളണ്ടും ഇല്ലാത്ത ഒരു ലോകകപ്പ്. ഒരു പക്ഷെ 30 വയസ്സുള്ള ലയണൽ മെസ്സിക്കും 33 വയസ്സുള്ള ക്രിസ്റ്റ്യാനോ റൊണാൾഡോയ്ക്കും ഇതവസാന ലോക കപ്പ് മത്സരമായേക്കാം. ആരൊക്കെ വാഴും; ആരൊക്കെ വീഴും; ആരൊക്കെ കറുത്ത കുതിരകളാകും; ആരൊക്കെ അട്ടിമറിക്കപ്പെടും; പ്രവചനങ്ങൾ അസാധ്യം !!!

Extra Time : കേരളത്തിലെ യുവ മനസിന് ഫുട്‌ബോള്‍ എന്നും ഒരു ലഹരി തന്നെയാണ്. കേരളവും ലോകകപ്പ്‌ ലഹരിയില്‍ മുഴുകിക്കഴിഞ്ഞു. (ലോക കപ്പ് മാത്രമല്ല... കോപ്പ അമേരിക്ക, യൂറോ കപ്പ്.... അങ്ങനെ ഏത് കാൽപ്പന്ത് ടൂർണമെന്റിനും ഇവിടെ ലഹരിക്ക്‌ കുറവൊന്നുമില്ല.) കേരളത്തി­ന്റെ ഓരോ മു­ക്കും മൂലയും ലോകകപ്പിനെ ആഘോഷിക്കുകയാണ്. നാ­ട്ടിൻ  പുറ­മെന്നോ നഗരമെന്നോ ഭേദമില്ലാതെ ഇഷ്ട ടീമുകളെ പ്രകീര്‍ത്തിച്ചു കൊണ്ടും എതിര്‍ ടീമിനെ വെല്ലു വിളിച്ചു കൊണ്ടും പോസ്റ്ററുകളും ബാനറുകളും ഉയര്‍ന്നിട്ടുണ്ട്. സോഷ്യൽ മീഡിയയിലും ലോകകപ്പ് തരംഗം അലയടിക്കുന്നു. സിനിമാ പോസ്റ്ററുകളിലെ നായകന്മാരെ അവതരിപ്പിക്കുന്ന വാചകങ്ങള്‍ ആണ് ഓരോ പോസ്റ്ററിലും ബാനറിലും. ബ്രസീലും കേരളവും തൊട്ടടുത്താണെന്നു തോന്നും ആരാധകരുടെ ഈ യുദ്ധം കണ്ടാല്‍. ഓരോ താരങ്ങളും തങ്ങളുടെ ­കൂടെ ക്ലബ്ബില്‍ കളിക്കുന്നവരാണ് എന്നാണു ഓരോ പോസ്റ്ററുകളും വായിച്ചാല്‍ തോന്നുക. ഇഷ്ട താരങ്ങളുടെ ജേഴ്സി അണിഞ്ഞു നടക്കുന്നവരും വാഹനങ്ങളില്‍ ഇഷ്ട ടീമുകളുടെ പതാക പ്രദര്‍ശിപ്പിക്കുന്നവരും കുറവല്ല. ബ്ര­സീ­ലി­നും അർ­ജന്റീ­ന­ക്കും ജർ­മ്മ­നിക്കുമാണ് പൊ­തു­വേ ആ­രാ­ധ­ക­ര്‍ കൂടുതല്‍. ഇം­ഗ്ള­ണ്ടി­നും  ഫ്രാൻ­സി­നും സ്പെയിനിനും പോർ­ച്ചു­ഗ­ലി­നുമൊ­ക്കെ ആരാധകര്‍ സജീവമാണ്. 

Shoot Out :  ഈ അവസരത്തില്‍ ഉയരുന്ന ചോദ്യങ്ങൾ പലതാണ്... 

ഇവിടത്തെ ജനങ്ങള്‍ ഫുട്ബോളിനോട് കാണിക്കുന്ന ആവേശത്തിന്റെയും താല്പര്യത്തിന്റെയും നൂറിലൊരംശം ഇവിടത്തെ ഭരണാധികാരികള്‍ ഈ കളിയെ പ്രോല്‍സാഹിപ്പിക്കാന്‍ കാണിക്കുന്നുണ്ടോ ?

ലോക തലത്തില്‍ ശ്രദ്ധിക്കപ്പെടാന്‍ ക്രിക്കറ്റിനേക്കാളും ഹോക്കിയെക്കാളും മറ്റേതൊരു കളിയെക്കാളും സാധ്യത ഫുട്ബോളിന് ഉണ്ടെന്നിരിക്കെ, ഫുട്ബോള്‍ വളര്‍ത്താന്‍ ഇവിടത്തെ ഭരണകൂടങ്ങള്‍ എന്താണ് ചെയ്യുന്നത് ?

ഈ കളിയ്ക്ക് ഇവിടെ ലഭ്യമായിട്ടുള്ള മത്സരവേദികളില്‍ ജയിക്കുകയോ നേട്ടങ്ങള്‍ കൊയ്യുകയോ ചെയ്ത ടീമുകളെയോ വ്യക്തികളെയോ അര്‍ഹിക്കുന്ന രീതിയില്‍ അംഗീകരിക്കുകയോ ആദരിക്കുകയോ ചെയ്യാന്‍ ഇവിടത്തെ ഭരണകൂടങ്ങള്‍ ശ്രമിക്കാറുണ്ടോ ?

നല്ല കളിസ്ഥലങ്ങളും പരിശീലന സംവിധാനങ്ങളും ഒരുക്കുന്നതില്‍ ഗവണ്മെന്‍റ് വിജയിച്ചിട്ടുണ്ടോ ?

ഒരു ചെറിയ ഗ്രൗണ്ടിനു ചുറ്റും നിന്ന് കാണുന്ന സെവൻസ് ഫുട്‌ബോളും, ജില്ലാ ലീഗും സംസ്ഥാന ലീഗും ദേശീയ ലീഗുമൊക്കെ അങ്ങനെയൊക്കെ നടന്നു പോയ്ക്കോളും എന്ന രീതിയിലുള്ള അധികാരികളുടെ വികല മനസ്ഥിതി അല്ലെ നമ്മുടെ സാധ്യതകള്‍ ഇല്ലാതാക്കുന്നത് ?

ഇത്തരം അവഗണനകള്‍ക്കെതിരെ ഇപ്പോള്‍ ഉറക്കമിളച്ചു കട്ടന്‍ ചായയും കുടിച്ചു കളി കാണുന്നവര്‍ എത്രത്തോളം പ്രതികരിച്ചിട്ടുണ്ട്

ഇപ്പോള്‍ വിദേശ ടീമുകളുടെ ഫ്ലക്സ്‌ വയ്ക്കാനും കൊടി കെട്ടാനും നടക്കുന്നവര്‍ സംഘടിച്ചു വില പേശിയാല്‍ തന്നെ നമ്മുടെ രാഷ്ട്രീയക്കാര്‍ അനുകൂലമായ നിലപാടുകള്‍ എടുക്കില്ലെ ?

സെലിബ്രിറ്റി ക്രിക്കറ്റിനു പോലും സ്റ്റേഡിയം നിറഞ്ഞു കവിയുന്ന നമ്മുടെ നാട്ടില്‍ ഫെഡറേഷന്‍ കപ്പിനും നമ്മുടെ ലോക്കല്‍ ലീഗുകള്‍ക്കും കാണികള്‍ കുറയുന്നതിന് ആരെയാണ് കുറ്റം പറയേണ്ടത് ?

ഇത്തരം ചെറുകിട മത്സരങ്ങളെ പ്രോത്സാഹിപ്പിക്കുന്ന എന്ത് നടപടികളാണ് നമ്മുടെ മാധ്യമങ്ങള്‍ സ്വീകരിച്ചിട്ടുള്ളത് ?

പ്രോത്സാഹനവും ജനക്കൂട്ടവും തന്നെയാണ് ഏതൊരു കളിക്കാരനെയും കളിയേയും മികച്ച നിലവാരത്തിലെത്തിക്കുന്നത്. പ്രീമിയർ ലീഗും സ്പാനീഷ് ലീഗും ഇംഗ്ലീഷ് ലീഗും മാത്രം നോക്കിയിരിക്കാതെ നമ്മുടെ നാട്ടില്‍ നടക്കുന്ന കളികളിലും പരമാവധി കാണികള്‍ ഉണ്ടെന്നു ഉറപ്പു വരുത്തേണ്ടത് ഓരോ ഫുട്ബോള്‍ പ്രേമിയുടെയും കടമയല്ലേ ?

Sudden Death (കാടനടി) : മനുഷ്യ വിഭവ ശേഷിയും സാമ്പത്തിക ഭദ്രതയും നമ്മുടെ അത്ര പോലുമില്ലാത്ത, നമ്മുടെ നാട്ടിലെ ഒരു നിയോജകമണ്ഡലത്തിന്റെയത്ര വലിപ്പമില്ലാത്ത രാജ്യങ്ങൾ പോലും ഇന്ന് ലോക ഫുട്‌ബോളി മികച്ച പ്രകടനം നടത്തുമ്പോള്‍, ലോകഫുട്ബാള്‍ നിലവാരത്തിന്റെ എഴയല്‍പക്കം ചെല്ലാന്‍ യോഗ്യത ഇല്ലാതെ,  ഇവിടെ കുത്തിയിരുന്നു വിദേശ രാജ്യങ്ങള്‍ക്ക് വേണ്ടി ആര്‍ത്തു വിളിക്കുന്നതു കാണുമ്പോള്‍ "കല്യാണരാമന്‍" സിനിമയില്‍ സലിംകുമാറിന്റെ കഥാപാത്രം പറയുന്ന പ്രശസ്തമായ കോമഡി ഡയലോഗാണ് ഓര്‍മ്മ വരുന്നത്


 "എന്തിനോ വേണ്ടി തിളയ്ക്കുന്ന സാമ്പാര്‍ !!!"

ഈ ബ്ലോഗിലെ പുതിയ പോസ്റ്റുകള്‍ ലഭിക്കാന്‍ താഴെയുള്ള ലിങ്കില്‍ ക്ലിക്ക് ചെയ്തിട്ടു ആ ഫേസ്‌ബുക്ക് പേജ് ലൈക്‌ ചെയ്യുക

അല്ലെങ്കില്‍ താഴെയുള്ള ലിങ്കില്‍ ക്ലിക്ക് ചെയ്തിട്ടു ആ ഫേസ്‌ബുക്ക് ഗ്രൂപ്പില്‍ ജോയിന്‍ ചെയ്യുക


Saturday, 2 June 2018

ജാത്യാഭിമാനക്കൊലയുടെ ഇര നീനുവിനൊരു മുന്നറിയിപ്പ്...!!!

പ്രിയ നീനു....

ഇപ്പോൾ നീ കാണുകയും കേൾക്കുകയും ചെയ്യുന്ന ഐകദാർഢ്യ പ്രഖ്യാപനങ്ങളിലും സഹതാപ പ്രകടനങ്ങളിലും ഒത്തിരി ആശ്വസിക്കുകയോ സന്തോഷിക്കുകയോ അരുത്; മാത്രവുമല്ല അതിനെയൊക്കെ നീ തെല്ല് ഭയക്കേണ്ടതുമുണ്ട്...

നീ കെവിന്റെ വിധവയായി കഴിയാനുറച്ചു എന്ന തീരുമാനത്തിനെ അനശ്വര പ്രണയത്തിന്റെയും സമർപ്പണത്തിന്റെയും ധീരതയുടെയും ഒക്കെ ഉദാത്തമാതൃക എന്ന നിലയിൽ വാഴ്ത്തുപാട്ട് രചിച്ചു കൊണ്ടിരിക്കുകയായിരുന്നു ഈ പൊതുസമൂഹം ഇത് വരെ. ഇപ്പോൾ നീ വീണ്ടും പഠനത്തിനായി കോളേജിലേക്ക് തിരിച്ചു വന്നപ്പോഴും മാധ്യമങ്ങളും സമൂഹവും നിന്നെ പ്രോത്സാഹിപ്പിക്കുന്ന തിരക്കിലാണ്. പക്ഷെ, കവലക്കൂട്ടങ്ങളിലും പരദൂഷണക്കമ്മിറ്റികളിലും നീ ഭാവിയിൽ എന്ത് ചെയ്യുമെന്ന പ്രവചനങ്ങൾ ചർച്ച ചെയ്ത് തുടങ്ങിയിട്ടുണ്ട്.

നിനക്ക് കേവലം 20 വയസ് മാത്രമേ ഉള്ളുവെന്നും നീയൊരു വിദ്യാർത്ഥിനി ആണെന്നുമൊക്കെ ഈ സമൂഹം മറക്കാൻ അധികം സമയം വേണ്ട. നീ വെള്ളയുടുത്ത് എന്നും കെവിന്റെ ഓർമ്മകളിൽ ജീവിച്ചു തീർക്കുന്നതിനോടായിരിക്കും ഭൂരിപക്ഷ സമൂഹത്തിനെന്നും താല്പര്യം. സമാനതകളില്ലാത്ത മാനസിക സമ്മർദ്ദമനുഭവിക്കുന്ന പെൺകുട്ടിയുടെ വിഭ്രാന്തിയോളം പോന്ന വികാരഭരിതമായ വാക്കുകൾക്ക് ഈ സമൂഹ മനഃസാക്ഷി നൽകുന്ന പ്രാധാന്യം നാളെ നിന്റെ നേരെ വിരലുകൾ ചൂണ്ടാൻ കാരണമായേക്കും. 

പെരുമ്പാവൂരിലെ ജിഷയുടെ അമ്മയ്ക്ക് ഐകദാർഢ്യപ്പെരുമഴയും സഹതാപക്കടലും സഹായപ്രളയവും ഒരുക്കിയവർ തന്നെയാണ് ആ അമ്മയെ സദാ പിന്തുടർന്ന് അവരുടെ സ്വകാര്യ ജീവിതത്തിലേക്ക് നിരന്തരം ഉറ്റു നോക്കുന്നതും ക്യാമറകൾ പായിക്കുന്നതും സോഷ്യൽ ഓഡിറ്റിംഗ് നടത്തുന്നതും സമൂഹത്തിൽ താറടിക്കുന്നതും അവഹേളിക്കുന്നതും. 

ദുരന്തങ്ങളേറ്റു വാങ്ങാൻ വിധിക്കപ്പെട്ടവർക്ക്, സഹായവും സഹതാപവും ഒക്കെ ഞങ്ങൾ നൽകും. പക്ഷെ, പിന്നീടവർ ഞങ്ങൾ ആഗ്രഹിക്കുന്ന രീതിയിലേ ജീവിക്കാൻ പാടുള്ളു എന്ന് ഞങ്ങൾക്ക് നല്ല നിർബന്ധമുണ്ട്. ദുരന്തങ്ങളുടെ ഇരകൾ കഷ്ടിച്ച് ഉപജീവനമേ നടത്താവൂ; വളർച്ചയിലേക്ക് അതിജീവനം നടത്തുന്നത് ഞങ്ങളിലെ ഫ്യൂഡലിസ്റ്റുകൾക്ക് ഇഷ്ടമല്ല.   

പ്രിയ സോദരി നീനു, നീയിനി സന്തോഷിക്കാനോ ആഘോഷിക്കാനോ ഭേദപ്പെട്ട മറ്റൊരു ജീവിതം ആഗ്രഹിക്കാനോ പാടില്ല; അതിന് സമ്മതിക്കില്ല ഞങ്ങൾ. ഞങ്ങളുടെ സോഷ്യൽ ഓഡിറ്റിങ് കണ്ണുകൾ സദാ നിന്റെ മേൽ ഉണ്ടായിരിക്കും...... അത് കൊണ്ട് വളരെ സൂക്ഷിച്ച് കരുതലോടെ വേണം ഭാവി കെട്ടിപ്പടുക്കാൻ.... പറ്റുമെങ്കിൽ മറ്റൊരു നാട്ടിൽ പോയി.... കാരണം ഞങ്ങൾ വരയ്ക്കുന്ന വരയ്ക്ക് പുറത്തു പോകുന്നവരെ ഞങ്ങൾ വെറുതെ വിടില്ല; ഞങ്ങൾ ആഗ്രഹിക്കുന്ന രീതിയ്ക്ക് പുറത്ത് ജീവിക്കുന്നവരെ ഞങ്ങൾ ജീവിക്കാൻ അനുവദിക്കില്ല..!!!!

പെരുമ്പാവൂരിലെ ജിഷയുടെ അമ്മയെ അപഹസിക്കുന്നതിനെതിരെ എഴുതിയ കുറിപ്പ് ഈ ലിങ്കിൽ ക്ലിക്ക് ചെയ്‌താൽ വായിക്കാം....===> ധർമ്മം കൊടുത്ത് കഴിഞ്ഞിട്ട് അതിന്റെ പുറത്ത് സോഷ്യൽ ഓഡിറ്റിങ് നടത്തുന്ന അല്പന്മാർ...

ഈ ബ്ലോഗിലെ പുതിയ പോസ്റ്റുകള്‍ ലഭിക്കാന്‍ താഴെയുള്ള ലിങ്കില്‍ ക്ലിക്ക് ചെയ്തിട്ടു ആ ഫേസ്‌ബുക്ക് പേജ് ലൈക്‌ ചെയ്യുക

അല്ലെങ്കില്‍  താഴെയുള്ള ലിങ്കില്‍ ക്ലിക്ക് ചെയ്തിട്ടു ആ ഫേസ്‌ബുക്ക് ഗ്രൂപ്പില്‍ ജോയിന്‍ ചെയ്യുക

Thursday, 3 May 2018

നരേന്ദ്ര"മൗനി"യും "മൗൻ"മോഹൻസിങ്ങും : ഒന്നായ നിന്നെയിഹ രണ്ടെന്ന് കണ്ട.....!!!

2004 തുടങ്ങി പത്തു വർഷക്കാലം കോണ്‍ഗ്രസ്‌ നേതൃത്വം കൊടുത്ത് ഇന്ത്യ ഭരിച്ച യു പി എ സര്‍ക്കാരിന്റെ കടുത്ത ജനദ്രോഹങ്ങൾ സഹിക്കാതെ വന്നപ്പോള്‍ മുതല്‍ തലയ്ക്കു വെളിവുള്ള ഓരോ ഇന്ത്യക്കാരും ഉറ്റു നോക്കിയിരുന്ന കാര്യം ഒന്ന് മാത്രമായിരുന്നു. എന്നാണ് അടുത്ത തിരഞ്ഞെടുപ്പ് വരുന്നത്. മന്മോഹന്‍ ചക്രവര്‍ത്തിയും ചിദംബരം മന്ത്രിയും കൊട്ടാരം ഉപദേശകന്‍ അലുവാലിയ സാറും അമുല്‍ യുവരാജാവും മദാമ്മ റാണിയും മന്ത്രി സൈന്യവും ഒക്കെ കൂടി ഇവിടത്തെ  ജനത്തിനെ ക്ഷമയുടെ നെല്ലിപ്പലക എന്ന വസ്തു കാണിച്ചപ്പോഴാണ് ജനം നിലമറന്ന് ചിന്തിക്കാന്‍ തുടങ്ങിയത്. ഈ ജനദ്രോഹികള്‍ക്ക് ഒരു പണി കൊടുക്കാന്‍ ഇവരെ വലിച്ചു താഴെയിട്ടു "വേറെ ആരേയെന്കിലും" കയറ്റി ഇരുത്തണം എന്ന് മാത്രമേ അന്ന് സാമാന്യജനത്തിന്റെ ചിന്തയിലുണ്ടായിരുന്നുള്ളൂ. ജനദ്രോഹത്തിന് ഒരു ശിക്ഷ...അത്ര മാത്രം....അല്ലാതെ, പകരം വരുന്നവര്‍ നമ്മളെ അങ്ങ് സേവിച്ച് ആനന്ദ സാഗരത്തില്‍ ആറാടിക്കും എന്നൊന്നും ഇത് വരെ ഉള്ള അനുഭവം വച്ച്, വായിലൂടെ ഭക്ഷണം കഴിക്കുന്നവര്‍ ആരും ചിന്തിച്ചു കാണാൻ വഴിയില്ല. അങ്ങനെ പകരം വക്കാന്‍ ആര് എന്ന് നോക്കുമ്പോള്‍, കസേരയില്‍ കയറ്റി ഇരുത്താന്‍ യോഗ്യത ഉള്ള ആരെയും കാണാനില്ല എന്നതായിരുന്നു യാഥാർഥ്യം. പക്ഷെ ജനം ഒരു കാര്യം മനസിലാക്കി; യുപിഎ ഭരിച്ചനേക്കാള്‍ മോശമായിട്ടൊന്നും ആര് വിചാരിച്ചാലും ഭരിക്കാന്‍ പറ്റുകേല; അങ്ങേയറ്റം വഷളായിരുന്നു ഭരണരംഗം. മഷിയിട്ടു നോക്കിയിട്ടും ദേശീയ തലത്തില്‍ മെച്ചപ്പെട്ടൊരു ജനാധിപത്യബദല്‍ സാധ്യത ജനത്തിന് കണ്ടെത്താനായില്ല. 

അപ്പോഴാണ്‌ ‘ഗുജറാത്ത് മോഡൽ’ എന്ന കല്പിതകഥയുടെ മേമ്പൊടിയോടെ ഹൈടെക്‌ വികസനത്തിന്റെ മൊത്തകച്ചവടക്കാരൻ എന്ന നിലയിൽ മോദിയുടെ പേര് പ്രധാനമന്ത്രി സ്ഥാനത്തേക്ക് ബി ജെ പി മുന്നോട്ട് വച്ചത്. വികസനമിട്ടായി ദഹിക്കാത്തവർക്ക് വേണ്ടി 2002-ലെ ഗുജറാത്ത് നരഹത്യ വഴി ഉണ്ടാക്കിയെടുത്ത മുസ്ലിം വിരുദ്ധ സ്ട്രോങ്മാൻ ഇമേജ് കൂടി പ്രോജക്റ്റ് ചെയ്ത് നടത്തിയ പ്രൊഫഷണൽ പാക്കേജിങ് മികവിൽ മോഡി ഒരു തിരഞ്ഞെടുപ്പ് ഐക്കോൺ ആയി മാറി. കടുത്ത സംഘവിരോധികൾ പോലും, മോദി എങ്കില്‍ മോദി എന്ന് മാറിച്ചിന്തിച്ചു. സകല വിധ അതി നൂതന കമ്മ്യുണിക്കേഷന്‍ വിദ്യകളും ഉപയോഗിച്ച് നമോ എന്ന ബ്രാൻഡ് മാര്‍ക്കറ്റ്‌ ചെയ്യപ്പെട്ടു. അത്യന്തം ആസൂത്രിതവും ചടുലവും അസാധാരണവുമായ തന്ത്രങ്ങളിലൂടെ തെരഞ്ഞെടുപ്പ് യുദ്ധത്തിൽ ബി ജെ പി യുടെ തന്നെ കണ്ണ് തള്ളിച്ച് മോഡി ഈ രാജ്യത്തിന്റെ പ്രധാനമന്ത്രി പദത്തിലേറി. സമാനതകളില്ലാതെ ജയിച്ച് ചെങ്കോട്ടയില്‍ എത്തിയ മോഡി, പ്രധാനമന്ത്രി എന്ന നിലയില്‍ അദ്ദേഹത്തിന്റെ തുടക്കം ഗംഭീരമാക്കി. ഇന്ത്യയുടെ വര്‍ത്തമാനവും ഭാവിയും നിര്‍ണ്ണയിക്കുന്നതില്‍ ഏത് മുന്‍ സര്‍ക്കാറിനെക്കാളും മികച്ചു നില്‍ക്കണമെന്ന ദൃഡനിശ്ചയം തോന്നിപ്പിക്കുന്ന നീക്കങ്ങളായിരുന്നു അദ്ദേഹത്തില്‍ നിന്ന് കണ്ടത്‌. വാ തുറന്നു സംസാരിക്കുന്ന പ്രധാനമന്ത്രിയെ ഭാരതം കണ്ടിട്ട് കുറച്ചധികം കാലമായിരുന്നു. പൊതുവേ, സംസാരിക്കുന്ന കാര്യത്തില്‍ മന്‍മോഹന്‍സിങ് വളരെ ലുബ്ധനായിരുന്നു. സഭയില്‍ പോലും പ്രസംഗിച്ചത് അപൂര്‍വ്വമായിട്ടായിരുന്നു. യു പി ഏ ഉന്നതനേതാക്കളായ സോണിയ, രാഹുല്‍ മുതലായ ഗാന്ധിമാരും ഇക്കാര്യത്തില്‍  ഒട്ടും മെച്ചമായിരുന്നില്ല. പക്ഷെ, നരേന്ദ്രമോഡി അദ്ദേഹത്തിന്റെ വായ്ത്താരി കൊണ്ട് തുടക്കത്തിലേ ആവോളം കയ്യടി നേടി എന്നത് എടുത്തു പറയേണ്ട കാര്യമാണ്. രണ്ടു സഭകളിലും രാഷ്ട്രപതിയുടെ നയപ്രഖ്യാപനത്തിനു നന്ദി രേഖപ്പെടുത്തി നടന്ന ചര്‍ച്ചക്കുള്ള മറുപടി  പ്രധാനമന്ത്രി തന്നെയാണ് നടത്തിയത്.

സമാനതകളില്ലാത്ത ബ്രാന്‍ഡിംഗ് രീതികളിലൂടെയാണ് മോഡി തന്റെ ഇന്ദ്രപ്രസ്ഥയാത്ര ലക്ഷ്യത്തില്‍ എത്തിച്ചത്. ശരീരഭാഷയിലും വസ്ത്രധാരണത്തിലും പ്രസംഗത്തിലും തന്റേതു മാത്രമായ ഒരു ബ്രാന്‍ഡ് സൃഷ്ടിക്കുന്നതിനായിരുന്നു മോഡി ശ്രമിച്ചത്. എപ്പോഴും വിലയിരുത്തലുകള്‍ നടത്തുന്നത് താരതമ്യത്തിന്റെ കൂടി അടിസ്ഥാനത്തിലാണല്ലോ. മിണ്ടാമുനിയായി ജീവിക്കുന്ന മന്‍മോഹന്‍സിങ്ങിനെ ഊര്‍ജ്ജസ്വലനായ നരേന്ദ്രമോഡിയുമായി തിരഞ്ഞെടുപ്പ് വേളയില്‍ ജനം താരതമ്യം ചെയ്തു നോക്കി. കോണ്‍ഗ്രസിന്റെ അഴിമതി ഭരണവും ജനദ്രോഹപരമായ നയങ്ങളും മോഡിക്ക് ഇന്ദ്രപ്രസ്ഥത്തിലേക്കുള്ള വഴി എളുപ്പത്തില്‍ തുറന്നു കൊടുത്തു.  ഒന്നിനെ വലിച്ചെറിഞ്ഞ് മറ്റൊന്നിനെ പ്രതിഷ്ഠിക്കാന്‍ മാത്രം അവകാശമുള്ള ജനാധിപത്യരാഷ്ട്രത്തിലെ  ജനം ലഭ്യമായ പാലത്തില്‍ നിന്ന് തമ്മില്‍ ഭേദമെന്നു തോന്നിയ ഒന്നിനെ പ്രതിഷ്ഠിച്ചു എന്ന് പറഞ്ഞാൽ മതിയല്ലോ. 

രാജ്യത്ത് നടപ്പാക്കുന്ന നവലിബറല്‍ സാമ്പത്തിക നയത്തിന്‍െറ ഇരട്ട മുഖങ്ങളാണ് ബി.ജെ.പിയും കോണ്‍ഗ്രസുമെന്ന് ഇടതുപക്ഷ പാര്‍ട്ടികള്‍ എന്നും പറഞ്ഞിരുന്ന കാര്യമാണ്. കോണ്‍ഗ്രസും ബി.ജെ.പിയും ഒരേ സാമ്പത്തിക നയമാണ്‌ പിന്തുടരുന്നതെന്നും അവ ധനികര്‍ക്കുവേണ്ടിയുള്ളതാണെന്നും രണ്ടു പാര്‍ട്ടികളും ഇന്ത്യന്‍ കോര്‍പ്പറേറ്റുകളുടെ കളിപ്പാവകളാണെന്നും ഇടതുപക്ഷ പുരോഗമന ചേരിയിൽ പെട്ട നേതാക്കൾ സ്ഥിരതയോടെ അഭിപ്രായപ്പെട്ടിരുന്നു. രാജ്യത്ത് നയങ്ങള്‍ തീരുമാനിക്കുന്നത് കോര്‍പറേറ്റുകളാണെന്നും കോര്‍പറേറ്റുകളായ രാഷ്ട്രീയക്കാരുടെ എണ്ണം വര്‍ധിക്കുന്നു എന്നും "കോര്‍പറേറ്റുകള്‍ കോര്‍പറേറ്റുകളാല്‍ കോര്‍പറേറ്റുകള്‍ക്ക്" എന്ന രീതിയിലാണ് ഇപ്പോഴത്തെ ഇന്ത്യന്‍ ജനാധിപത്യത്തിന്റെ പോക്കെന്ന് ആം ആദ്മി പാര്‍ട്ടിയും ജനത്തെ ഉത്ബോധിപ്പിക്കാന്‍ശ്രമിച്ചിരുന്നു. കോര്‍പറേറ്റുകള്‍ക്കുവേണ്ടിയുള്ള നയം നടപ്പാക്കുന്നതില്‍ കോണ്‍ഗ്രസും ബി ജെ പി യും ഒരേ തൂവല്‍പ്പക്ഷികലാണെന്നു കേജ്രിവാല്‍ പറഞ്ഞതിനും അധികമാരും ചെവി കൊടുത്തില്ല.

എന്തായാലും, 2014-ൽ പ്രസിഡന്‍റ് നടത്തിയ, എന്‍ ഡി ഏ ഗവണ്‍മെന്റിന്റെ പ്രഥമ നയ പ്രഖ്യാപന പ്രസംഗം തന്നെ പുതിയ സര്‍ക്കാര്‍ പഴയ യു പി ഏ സര്‍ക്കാരിന്റെ നയങ്ങള്‍ തന്നെയായിരിക്കും പിന്തുടരുക എന്ന് വിളിച്ചോതുന്നതായിരുന്നു. ഇത് കേട്ട്, തങ്ങള്‍ ഉണ്ടാക്കിയ മാവ് കൊണ്ട് എന്‍.ഡി.ഏ. അപ്പം ചുടുകയാണെന്നും ഇതില്‍ ഒരു പുതുമയും ഇല്ലെന്നും യു.പി.ഏ. പരിഹസിച്ചു. പേരിനെങ്കിലും, ദുര്‍ബലമായ ഭാഷയിൽ പോലും മോദിയോ ബി.ജെ.പി.യോ ഈ പരിഹാസത്തെ നിഷേധിച്ചില്ല. ഭരണത്തിൽ കയറിയ അന്ന് മുതൽ, സംഘപരിവാരത്തിലെ നേതാക്കളും സന്യാസിമാരും വായിൽ തോന്നിയത് കോതക്ക് പാട്ട് എന്ന നിലയിൽ ശുദ്ധവിവരക്കേടുകളും അന്യമതവിദ്വേഷപ്രസ്താവനകളും വിളിച്ചു പറഞ്ഞു കൊണ്ടിരുന്നു. ഓരോ ദിവസവും മതേതര ഇന്ത്യക്ക് നാണക്കേടുണ്ടാക്കുന്ന, ഒറ്റപ്പെട്ടതെങ്കിലും സമാന സ്വഭാവമുള്ള അക്രമസംഭവങ്ങൾ ഇന്ത്യയിൽ മൊത്തം അരങ്ങേറിക്കൊണ്ടിരുന്നു. എണ്ണമറ്റ വിദേശയാത്രകളിലും വില കൂടിയ ആഡംബര വേഷവിതാനങ്ങളിലും അഭിരമിച്ചു ജീവിക്കുന്ന പ്രധാനമന്ത്രി രാജ്യത്തു നടക്കുന്ന അക്രമങ്ങളെപ്പറ്റിയോ പ്രധാനപ്പെട്ട സംഭവവികാസനകളെപ്പറ്റിയോ വാ തുറന്ന് ക മാ എന്ന് മിണ്ടാത്ത നയം തുടരുന്നു. 

യു പി എ കാലത്തെ അപേക്ഷിച്ച് ക്രൂഡ് ഓയിൽ വില നന്നേ താഴ്ന്നപ്പോൾ ഇന്ധനവില അന്നത്തേതിന്റെ ഇരട്ടിയാകാൻ തുടങ്ങുന്നു. ഇന്ത്യയിൽ നികുതിയടയ്ക്കാതെ സ്വിസ്സ് ബാങ്കിലും ടാക്സ് ഹെവനുകളിലും പൂഴ്ത്തി വച്ചിരിക്കുന്ന ലക്ഷക്കണക്കിന്‌ കോടി രൂപയുടെ കള്ളപ്പണം ഇപ്പൊ തിരിച്ചുപിടിക്കുമെന്ന് ഗീർവാണം അടിച്ചു കൊണ്ടായിരുന്നു മോഡി തിരഞ്ഞെടുപ്പിനെ നേരിട്ടത്. പണം തിരികെ കൊണ്ട് വന്നില്ല എന്നത് പോട്ടെ; മുൻ യു പി എ സർക്കാർ ചെയ്തതു പോലെ തന്നെ കള്ളപ്പണക്കാരുടെ വിവരങ്ങൾ അപ്പാടെ വെളിപ്പെടുത്തിയാൽ ശരിയാവില്ല എന്ന നിലപാടിലാണ് ഇപ്പോൾ മോഡി സർക്കാറും. യുപിഎ കാലത്തേ അത്രയും ഭീമമല്ലെങ്കിലും അഴിമതി ആരോപണങ്ങളും സ്വജനപക്ഷപാത ആരോപണങ്ങളും മോഡി സർക്കാരും നേരിടുന്നു. ജനദ്രോഹപരമെന്ന് പരക്കെ വ്യാഖ്യാനിക്കപ്പെട്ട നോട്ട് നിരോധനവും നികുതി പരിഷ്കരണവും പാളിപ്പോയതായി NDA നേതാക്കൾ തന്നെ വിളിച്ചു പറയുന്നു. അവ വിജയമായിരുന്നു എന്ന് സ്ഥാപിക്കുന്നതിൽ മോദിയും സംഘവും ദയനീയമായി പരാജയപ്പെടുന്നു. പഴയ സർക്കാരുകളുടെ പദ്ധതികൾ തന്നെ ചില്ലറ ഭേദഗതികളോടെ ഹിന്ദി പേരിട്ട് തുടരുന്നു. സ്വച്ഛ്‌ ഭാരത് പദ്ധതി കൊണ്ട് കാര്യമായ സ്വച്ഛതയൊന്നും ഉണ്ടായതായി കാണാനില്ല.  കൊട്ടിഘോഷിച്ച മേക്ക് ഇൻ ഇന്ത്യയും പച്ചപിടിച്ചില്ല .

ചുരുക്കത്തിൽ, പഴയ യു.പി.ഏ. യുടെ ബി ടീമായി ഭരണം തള്ളി നീക്കുന്നു. ഈ ഭരണം കൊണ്ട്, ആകെയുണ്ടായ മാറ്റം മൻമോഹൻ സിങ്ങിന് നാവുണ്ടെന്ന് ജനം തിരിച്ചറിഞ്ഞു എന്നതാണ്. മൈതാന പ്രസംഗത്തിൽ അതിവാചാലനായിരുന്ന മോഡിയുടെ വായിൽ നാക്കുണ്ടോ എന്ന് വായിൽ കയ്യിട്ട് നോക്കേണ്ട സ്ഥിതിയാണ് പലപ്പോഴും. അടുത്തിടെ ഫേസ്‌ബുക്കിൽ ഒരു പ്രയോഗം കണ്ടിരുന്നു....നരേന്ദ്ര സിങ്ങും മന്‍മോഹന്‍ മോഡിയും... മന്‍മോഹന്‍സിങ്ങിന്റെ മൗനത്തെ നിശിതമായി വിമർശിച്ചതും ക്രൂരമായി പരിഹസിച്ചും പ്രധാനമന്ത്രിപദത്തിലെത്തിയ മോഡി മൗനസാഗരത്തിൽ ആറാടുമ്പോൾ മൻമോഹൻ സിങ് സഭയ്ക്കകത്തും പുറത്തും, പ്രധാനമന്ത്രി നരേന്ദ്ര മോഡിയെ ഉറച്ച ഭാഷയിൽ ഉയർന്ന ശബ്ദത്തിൽ വാചാലമായി വിമർശിക്കുന്നു. പഴയ പ്രധാനമന്ത്രിയെ ജനം "മൗൻ" മോഹൻസിംഗ് എന്ന് വിളിച്ചിരുന്നെങ്കിൽ ഇപ്പോഴത്തെ പ്രധാനമന്ത്രിയെ ജനം നരേന്ദ്ര "മൗനി"യെന്നു വിളിച്ചു തുടങ്ങിയിരിക്കുന്നു. 

തിരഞ്ഞെടുപ്പില്‍ ജനം പാടേ തള്ളിക്കളഞ്ഞ യു പി ഏ നയങ്ങള്‍ തുടരാനാണെങ്കില്‍ എന്തിനാണ് ഇങ്ങനെ ഒരു സര്‍ക്കാറിനെ അവരോധിച്ചത് എന്ന ഇച്ഛഭംഗം ജനങ്ങളെ വേട്ടയാടിത്തുടങ്ങിയിരിക്കുന്നു. ഇതേ നയങ്ങളുടെ ഇരകളാണ് കോണ്‍ഗ്രസിനെ ചരിത്രത്തിന്റെ ചവറ്റുകുട്ടയിലേക്ക് തൂത്തെറിഞ്ഞത് എന്ന തിരിച്ചറിവില്ലാത്തവരാണോ മോദിയും സംഘവും കൂട്ടാളികളും ? കോര്‍പറേറ്റുകള്‍ക്ക് ഒട്ടനവധി ഇളവുകളും ആനുകൂല്യങ്ങളും സൗകര്യങ്ങളും വാരിക്കോരി നല്‍കിയിട്ട് സാധാരണക്കാരെയും പാവപ്പെട്ടവരെയും ഞെക്കിപ്പിഴിഞ്ഞ് പോകുന്ന ഈ ഭരണത്തിന് പഴയ ഭരണത്തെക്കാൾ എന്ത് മേന്മയാണ് അവകാശപ്പെടാനുള്ളത് ? അവസാനം, തൊപ്പി വച്ച താടിക്കാരനും തൊപ്പിയില്ലാത്ത താടിക്കാരനും തമ്മില്‍ കോടിയുടെ നിറത്തിലും മുദ്രാവാക്യത്തിലും മാത്രമേ മാറ്റമുണ്ടായിരുന്നുള്ളൂ എന്ന് തെളിയുകയാണോ ? 

ചുമ്മാ ഇരിക്കട്ടെ രണ്ട് കഥകൾ : 

കഥ 1 : ഒരിടത്ത് ഒരു കടത്തുകാരന്‍ ഉണ്ടായിരുന്നു. സ്ത്രീ വിഷയത്തില്‍ അല്‍പ്പം ദൌര്‍ബല്യം ഉണ്ടായിരുന്ന അയാള്‍ കരയില്‍ നിന്നും മൂന്നടി മാറിയേ വള്ളം നിര്‍ത്തുമായിരുന്നുള്ളൂ. അപ്പോള്‍ സ്ത്രീകള്‍ സാരി നനയാതിരിക്കാന്‍ മുട്ടൊപ്പം സാരി പൊക്കിപ്പിടിച്ചു നടക്കും. നമ്മുടെ കടത്തുകാരന്‍ മുട്ടൊപ്പം നഗ്നമായ അവരുടെ കാല്‍ കണ്ടു നിര്‍വൃതി അടയും. വെറുത്തു പോയ സ്ത്രീകള്‍ പരസ്പരം പറഞ്ഞു. ഇയാള്‍ ഒന്ന് ചത്ത്‌ തുലഞ്ഞിരുന്നെങ്കില്‍ നന്നായിരുന്നു. അവരുടെ പ്രാര്‍ത്ഥന ദൈവം കേട്ടു. നമ്മുടെ വൃത്തികെട്ട കടത്തുകാരന്‍ മരിച്ചു; അദ്ദേഹത്തിന്റെ മകന്‍ കടത്തു തുടങ്ങി. സന്തോഷത്തോടെ വഞ്ചിയില്‍ കയറിയ സ്ത്രീകള്‍ കരക്കെത്തിയപ്പോള്‍ ഞെട്ടി. വഞ്ചി കരയില്‍ നിന്ന് ആറടി മാറ്റിയാണ് വഞ്ചി നിര്‍ത്തിയത്. ഇപ്പോള്‍ അരക്കൊപ്പം സാരി പൊക്കിപ്പിടിച്ചാലെ നനയാതെ പോകാനൊക്കൂ. അവര്‍ പരസ്പരം പറഞ്ഞു; ഇവന്റെ അച്ഛന്‍ എന്ത് തങ്കപ്പെട്ട മനുഷ്യനായിരുന്നു. ഇവന്‍ വെറും വൃത്തി കെട്ടവന്‍ എന്ന്. 

കഥ 2 : പോക്കർ ഒരു പെണ്ണ് കെട്ടി. കല്യാണം കഴിഞ്ഞു പത്തു വർഷവും കഴിഞ്ഞു. ഒരു ദിവസം പോക്കർ പുറത്തു പോയി തിരിച്ചു വരുമ്പോൾ പെമ്പ്രന്നോര് മുറ്റത്ത്‌ തുപ്പുന്നു. കലി കയറിയ പോക്കർ അവളുടെ മുതുകിനിട്ട് ഒരു ചവിട്ട് കൊടുത്തിട്ട് അപ്പൊത്തന്നെ മൊഴി ചൊല്ലി വീട്ടിൽ കൊണ്ടാക്കി. ശേഷം നല്ല വൃത്തിയും മെനയുമുള്ള മറ്റൊരു മൊഞ്ചത്തിയെ കെട്ടിക്കൊണ്ടുവന്നു. പത്തു ദിവസം കഴിഞ്ഞ്, പോക്കർ പുറത്തു പോയി തിരിച്ചു വരുമ്പോൾ പുതിയ പെമ്പ്രന്നോര് ഉമ്മറത്തിരുന്നു മുള്ളുന്നു. പകച്ചു പോയി പാവം പോക്കർ...

ഇപ്പോള്‍ ചില വാര്‍ത്തകളും പ്രസ്താവനകളും പേപ്പറില്‍ വായിക്കുമ്പോഴും ടി വിയില്‍ കാണുമ്പോഴുമൊക്കെ ഈ കഥകൾ ഓര്‍മ്മ വരുന്നു. എന്താണോ എന്തോ ??? ഈ പരിതഃസ്ഥിതിയിലാണ് രാജ്യം ദേശീയ പൊതു തിരഞ്ഞെടുപ്പിലേക്ക് അടുക്കുന്നത്. എന്താവും ഫലം....

ഫേസ്‌ബുക്കിൽ Georgekutty Kiliyantharayil എന്നയാൾ പോസ്റ്റ് ചെയ്ത ഒരു നിരീക്ഷണം പങ്കു വയ്ക്കാം... 

2002-ലെ ഗുജറാത്ത് നരഹത്യ വഴി ഉണ്ടാക്കിയെടുത്ത anti-Muslim സ്ട്രോങ്മാൻ ഇമേജിന്റെയും, ‘ഗുജറാത്ത് മോഡൽ’ എന്ന കല്പിതകഥയുടേയും ബലത്തിൽ അധികാരത്തിലെത്തിയ മനുഷ്യനിൽ നിന്ന് എന്താണു പ്രതീക്ഷിക്കാനുണ്ടായിരുന്നത്? അതിനാൽ മോദിഭരണം വെള്ളംചേരാത്ത ദുരന്തം (unmitigated disaster) ആയിത്തീർന്നതിൽ ഒട്ടും അത്ഭുതമില്ല.

പക്ഷേ ഇത്ര നെറികെട്ട ഒരു ഭരണം രാജ്യം കണ്ടിട്ടില്ലെങ്കിലും, “മോദിക്കു പകരം രാഹുൽ” എന്ന ഫോർമുലയിൽ എനിക്കു തീരെ ഉത്സാഹമില്ല. ഇന്ത്യ പോലുള്ള ഒരു രാജ്യം ഭരിക്കാനുള്ള ബുദ്ധിശക്തിയോ രാഷ്ട്രീയ പാടവമോ രാഹുൽ ഗാന്ധിക്കുണ്ടെന്ന് തോന്നുന്നില്ല. ഇപ്പോഴത്തെ ദുരവസ്ഥയിൽ ഒരു hotch-potch മുന്നണി തട്ടിക്കൂട്ടി രാഹുലിനെ പ്രധാനമന്ത്രിയാക്കിയാൽ, ദീർഘകാലാടിസ്ഥാനത്തിൽ അത് ബിജെപിയെ സഹായിക്കുകയേയുള്ളു.

മോദിക്ക് 68 വയസ്സുപോലും ആയിട്ടില്ലെന്നോർക്കുക. ഇന്ത്യൻ രാഷ്ട്രീയത്തിൽ ഒന്നാന്തരം യുവത്വമാണത്. രാഹുൽ ഗാന്ധി പ്രധാനമന്ത്രിയും മോദി പ്രതിപക്ഷനേതാവുമായിരിക്കുന്ന സ്ഥിതി ഒന്നു സങ്കല്പിച്ചു നോക്കിക്കേ. മോദിയുടെ ഏറ്റവും മികച്ച പെർഫോർമൻസാകും അപ്പോൾ. പരമാവധി രണ്ടുവർഷത്തിനുള്ളിൽ മോദി പഴയ കസേരയിൽ തിരിച്ചുവരുകയും ചെയ്യും.

അതുകൊണ്ട്, 2019-ൽ രാഹുൽ ഗാന്ധിയെ വച്ചു കളിക്കാനാണുദ്ദേശമെങ്കിൽ, ഏറെ ആപത്തില്ലാത്ത ഒരു Razor-Thin ഭൂരിപക്ഷത്തിൽ മോദി തന്നെ ജയിക്കണമെന്നേ ഞാൻ പ്രാർത്ഥിക്കൂ. അടുത്ത ഇന്നിങ്ങ്സിൽ പുള്ളി ഒന്നുകൂടി കുളംതോണ്ടി കഴിയുമ്പോൾ ചിലപ്പോൾ നമുക്ക് ‘സംഘിമുക്തഭാരതം’ കിട്ടും. അതിനിടെ ദൈവാധീനമുണ്ടെങ്കിൽ, രാഹുൽ ഗാന്ധി ഒരു Non-Starter നേതാവാണെന്ന തിരിച്ചറിവ് കോൺഗ്രസ്സുകാരുടെ തലയിൽ കയറാനും മതി.

ഈ ബ്ലോഗിലെ പുതിയ പോസ്റ്റുകള്‍ ലഭിക്കാന്‍ താഴെയുള്ള ലിങ്കില്‍ ക്ലിക്ക് ചെയ്തിട്ടു ആ ഫേസ്‌ബുക്ക് പേജ് ലൈക്‌ ചെയ്യുക

അല്ലെങ്കില്‍  താഴെയുള്ള ലിങ്കില്‍ ക്ലിക്ക് ചെയ്തിട്ടു ആ ഫേസ്‌ബുക്ക് ഗ്രൂപ്പില്‍ ജോയിന്‍ ചെയ്യുക


Wednesday, 2 May 2018

ആഹ്വാന-പ്രോത്സാഹന വിദഗ്ദ്ധരുടെ അത്യുല്പാദന പദ്ധതികൾ

വൈവാഹികബന്ധത്തെക്കുറിച്ചും ഉത്തരവാദിത്വത്തോടെയുള്ള പിതൃത്വത്തെയും മാതൃത്വത്തെയും ജനനനിയന്ത്രണത്തെക്കുറിച്ചുമുള്ള സഭയുടെ നിലപാട് വിശദമായി പ്രതിപാദിക്കുന്നതായിരുന്നു പോള്‍ ആറാമന്‍ മാര്‍പാപ്പ പ്രസിദ്ധീകരിച്ച "ഹ്യൂമാനേ വീത്തേ" (മനുഷ്യജീവന്‍) എന്ന ചാക്രികലേഖനം. കൃത്രിമ ഗര്‍ഭ നിരോധന മാര്‍ഗ്ഗങ്ങളുടെ അസന്മാര്‍ഗ്ഗികതയെക്കുറിച്ചും അവ ഉപയോഗിക്കുന്നതിലെ ധാര്‍മ്മികമായ അപകടങ്ങളെക്കുറിച്ചും അവ പാപമാണെന്നും പഠിപ്പിച്ചതിനാല്‍ പ്രസിദ്ധീകരിക്കപ്പെട്ട കാലയളവില്‍ത്തന്നെ ഈ ലേഖനം വ്യാപകമായ ചര്‍ച്ചകള്‍ക്ക് ഇടയാക്കിയിരുന്നു. "ഹ്യൂമാനേ വീത്തേ" പ്രസിദ്ധീകരിച്ചതിന്‍റെ അൻപതാം വര്‍ഷമാണ് 2018. പാപ്പയുടെ ഈ പ്രബോധനം വിശ്വാസികള്‍ എത്ര മാത്രം അതിന്‍റെ ചൈതന്യത്തില്‍ മനസ്സിലാക്കിയിട്ടുണ്ട് എന്ന് പരിശോധിക്കുന്നതിനായി സീറോ മലബാര്‍ കുടുംബ പ്രേഷിതകേന്ദ്രം തയ്യാറാക്കിയ ചോദ്യാവലി ഇപ്പോൾ കടുത്ത വിമർശനമേറ്റു വാങ്ങുകകയാണ്. ചോദ്യങ്ങൾ പലതും സ്വകാര്യതയിലേക്കുള്ള കടന്നുകയറ്റം നടത്തുന്നതാണ്, സ്ത്രീത്വത്തെ അപമാനിക്കുന്നതാണ് എന്നൊക്കെയാണ് വിമർശകരുടെ പക്ഷം. വിമർശനങ്ങളിൽ കഴമ്പില്ല എന്ന് സമർത്ഥിക്കുന്ന ഔദ്യോഗിക വിശദീകരണക്കുറിപ്പും സഭയുടെ ഭാഗത്ത് നിന്ന് വന്നു കഴിഞ്ഞു. ചോദ്യാവലിയിലെ ഡി സെക്ഷനിലെ രണ്ടാം നമ്പർ ചോദ്യം രസകരമാണ്. “മനുഷ്യജീവൻ ദൈവദാനമാകയാൽ, ഗുണമോ, എണ്ണമോ മാനദണ്ഡമാകരുത് – ആശയം വ്യക്തമാക്കുക”. ഈ ചോദ്യത്തിന് നൽകിയിരിക്കുന്ന Answer Options ‘ശരി’, ‘തെറ്റ്’, ‘അറിയില്ല’, എന്നിവയാണ്. ഈ മൂന്നിലൊന്ന് ടിക്ക് ചെയ്‌താൽ ആശയം വ്യക്തമാവുമോ ? ചോദ്യാവലി തയ്യാറാക്കിയവർക്ക് പറ്റിയ Drafting Lapse ആണെന്ന് കരുതി വിട്ടു കളയുന്നു. ചോദ്യാവലി പൂരിപ്പിക്കുന്നവരുടെ പേരും തിരിച്ചറിയൽ വിവരങ്ങളും ഇല്ലാത്തതിനാൽ സ്വകാര്യത നഷ്ടപ്പെടുന്നില്ല എന്ന വാദം മുഖവിലക്കെടുക്കുന്നു. പക്ഷെ, ചിന്തിച്ചാൽ മനസിലാകുന്നത് ഇതൊരു വിവരശേഖരണത്തിൽ ഉപരി പിൻവാതിലിലൂടെയുള്ള സിദ്ധാന്തോപദേശ (Indoctrination) പദ്ധതിയാണെന്നാണ്. തികച്ചും കൗശലം നിറഞ്ഞ ഉദ്ദേശ്യാധിഷ്ഠിത (Objective Type) ചോദ്യങ്ങളാണ് ചോദ്യാവലിയിൽ. കൃത്യമായ ഉത്തരത്തിന് വേണ്ടിയുള്ള അന്വേഷണത്തിനിടയിൽ ആശയങ്ങൾ മനസ്സിൽ നടുകയാണ് ഉദ്ദേശം. ജനന നിയന്ത്രണ ബോധവൽക്കരണവും അത്യുൽപ്പാദന പ്രചരണവും തന്നെയാണ് ലക്ഷ്യങ്ങൾ. എന്ത് സംഭവിക്കും !? അവശ്യം കൗശലം കയ്യിലുള്ള പ്രായോഗികവാദികളെ ഇതൊന്നും ബാധിക്കില്ല; കുറെ പേർ "തെറ്റ്" തിരിച്ചറിഞ്ഞ് ആവർത്തിക്കാതിരിക്കാനും ചെയ്ത് പോയ തെറ്റുകൾക്ക് പരിഹാരം ചെയ്യാനും ബദ്ധപ്പെടും; കുറെ പേർ പാപബോധത്തിനും കുറ്റബോധത്തിനും അടിമപ്പെട്ട് കൂടുതൽ ന്യൂറോട്ടിക്ക് ആവും; വിധേയരുടെ എണ്ണം തീർച്ചയായും വർദ്ധിക്കും

മതഗ്രന്ഥത്തിന്റെ അനുശാസനങ്ങൾ അനുസരിച്ച് തന്നെ സന്താനപുഷ്ടിയുടെ പിൻബലത്തിൽ പെരുകി വലിയ ജനതയാകാൻ നിയോഗിക്കപ്പെട്ട മതാനുയായികൾ ആണ് ക്രൈസ്തവർ. ബൈബിളിലെ ഉല്പ്പത്തി പുസ്തകം ഒന്നാമദ്ധ്യായത്തിൽ തന്നെ ദൈവം മനുഷ്യന് ആദ്യമായി നല്കുന്ന നിർദ്ദേശവും അതിനു വേണ്ട അനുഗ്രഹവും ഇതുമായി ബന്ധപ്പെട്ടതാണ്. "ദൈവം അവരെ ഇങ്ങനെ അനുഗ്രഹിച്ചു: സന്താനപുഷ്ടിയുള്ളവരായി പെരുകുവിന്‍. ഭൂമിയില്‍ നിറഞ്ഞ് അതിനെ കീഴടക്കുവിന്‍. കടലിലെ മത്‌സ്യങ്ങളുടെയും ആകാശത്തിലെ പറവകളുടെയും ഭൂമിയില്‍ ചരിക്കുന്ന സകല ജീവികളുടെയും മേല്‍ നിങ്ങള്‍ക്ക് ആധിപത്യം ഉണ്ടായിരിക്കട്ടെ". ഉൽപ്പത്തി പുസ്തകം 9:1അനുസരിച്ച്‌ "ജലപ്രളയത്തില്‍ നിന്നു നോഹയേയും, കുടുംബത്തെയും ദൈവം സംരക്ഷിച്ചു. പ്രളയം കഴിഞ്ഞു പുറത്തുവന്ന നോഹയെയും പുത്രന്മാരെയും അനുഗ്രഹിച്ചുകൊണ്ടു ദൈവം പറഞ്ഞു: "സന്താനപുഷ്ടിയുണ്ടായി, പെരുകി, ഭൂമിയില്‍ നിറയുവിന്‍'' 

ബൈബിളിലെ ഈ നിർദ്ദേശം പോരാത്തതിന്, കാലാകാലങ്ങളിൽ മാറി വന്ന മാർപ്പാപ്പമാർ, ബിഷപ്പുമാർ, പട്ടക്കാർ, ധ്യാനഗുരുക്കൾ, പിന്നെ വാളെടുത്തവരും അല്ലാത്തവരും ആയ തീവ്ര വെളിച്ചപ്പാടുകൾ പലരും നാഴികയ്ക്ക് നാൽപ്പത് വട്ടം ഒളിഞ്ഞും തെളിഞ്ഞും രഹസ്യത്തിലും പരസ്യത്തിലും സഭാമക്കളുടെ എണ്ണം വർദ്ധിപ്പിക്കാൻ ഉപദേശിച്ചു കൊണ്ടിരിക്കുന്നു. സംസ്ഥാനത്ത് ക്രൈസ്തവരുടെ ജനസംഖ്യ ആനുപതികമായി കുറയുകയാണെന്നും ഇത് അപകടകരമായ പ്രവണതയാണെന്നും വ്യക്തമാക്കുന്ന ഇടയലേഖനങ്ങൾ പലവട്ടം നമ്മുടെ പള്ളികളിൽ കേട്ടിരുന്നു. "കൂടുതൽ മക്കൾ, കൂടുതൽ ഭദ്രത" എന്ന ആശയ പ്രചാരണവും സഭ നടത്തിയിരുന്നു. ഈ ശ്രേണിയിൽ ഒടുവിലത്തേതായിരുന്നു ഇടുക്കി രൂപത മുൻ ബിഷപ്പ് മാർ ആനിക്കുഴിക്കാട്ടിൽ പിതാവ് ഇറക്കിയ ഇടയലേഖനം. "മക്കളിലൂടെ സമ്മാനിതരാകുന്ന മാതാപിതാക്കള്‍" എന്ന പേരിൽ ഒരു ലേഖനം അടുത്തിടെ കത്തോലിക്കാ സഭയുടെ വാരികയായ സത്യദീപത്തിൽ അച്ചടിച്ച്‌ വന്നിരുന്നു. സന്താനോൽപ്പാദനം വർദ്ധിപ്പിക്കാനുള്ള ആഹ്വാനങ്ങളും കൂടുതൽ സന്താനങ്ങൾ ഉണ്ടാക്കുന്നതിന് വേണ്ടി പ്രത്യേക ആനുകൂല്യങ്ങളും പ്രലോഭനങ്ങളും ഒക്കെ ഒളിഞ്ഞും തെളിഞ്ഞും സഭ വിശ്വാസികൾക്ക് വെച്ച് നീട്ടാറുണ്ടെന്നത് നിഷേധിക്കാനാവാത്ത യാഥാർഥ്യമാണ്. കത്തോലിക്കാ കുടുംബങ്ങളിൽ നാലിൽ കൂടുതൽ കുഞ്ഞുങ്ങളുണ്ടായാൽ, നാലാമത്തെ മുതൽ കുഞ്ഞുങ്ങളുടെ പഠനത്തിന് വരുന്ന ചിലവ് സഭ വഹിക്കുമെന്ന ഒരു വാഗ്ദാനം കേട്ടിരുന്നു; പ്രയോഗതലത്തിൽ അതിന്റെ വിശദാംശങ്ങൾ എങ്ങും കേട്ടതുമില്ല. നാലാമത്തെ കുഞ്ഞിന്റെ മാമോദീസ ബിഷപ്പ് നേരിട്ട് വന്ന് നടത്തിക്കൊടുക്കുമെന്ന വാഗ്ദാനവും കേട്ടിരുന്നു; ആ വാഗ്ദാനം കൃത്യമായി പാലിക്കപ്പെടുന്നുണ്ടെന്ന് എനിക്ക് കൃത്യമായി അറിയാം.

പണിയെടുത്ത് കുടുംബം പോറ്റുന്ന സാധാരണ മനുഷ്യരുടെ യഥാർത്ഥ ജീവിതത്തിന്റെ പശ്ചാത്തലത്തിൽ നോക്കിയാൽ ഈ ആഹ്വാനങ്ങൾ മനുഷ്യത്വപരമാണോ എന്ന് കൂടി ആലോചിക്കേണ്ടതുണ്ട്. ആഹ്വാനവും ഉൽപ്പാദനവും വലിയ ചിലവും ബുദ്ധിമുട്ടും ഇല്ലാത്ത കാര്യങ്ങളാണ്; രണ്ടിനും ചില്ലറ സുഖങ്ങളും ഉണ്ട്. പക്ഷെ, അത്യുൽപ്പാദനപദ്ധതിയോട് സഹകരിക്കുന്നതിന് മുൻപ് പല വട്ടം മനസ്സിൽ ചോദിച്ച് ഉത്തരം കണ്ടെത്തേണ്ട കുറെ ചോദ്യങ്ങളുണ്ട് ? ഇവരൊക്കെ ആഹ്വാനിക്കുന്നത് കേട്ട് പിള്ളേരെ ഉൽപ്പാദിപ്പിച്ചാൽ പിന്നെ നല്ല ഭക്ഷണവും വസ്ത്രവും രോഗം വരുമ്പോൾ ചികിത്സയും കൊടുത്ത് വളർത്താനുള്ള ചെലവ് ഈ ആഹ്വാന-പ്രോത്സാഹന ഫാക്റ്ററികൾ വഹിക്കുമോ ? ഈ കുട്ടികളുടെ വിദ്യാഭ്യാസം അവനവൻ തന്നെ നടത്തണ്ടേ ? അതൊക്കെ പോട്ടെ, പ്രസവം കഴിഞ്ഞു ആശുപത്രി വിടുന്നത് വരെ ഉള്ള ചിലവെങ്കിലും ഈ ആഹ്വാനക്കാർ വഹിക്കുമോ ? 

ആകെയുള്ള ഭാഗ്യം എന്താണെന്ന് വച്ചാൽ, ഭൂരിപക്ഷം വരുന്ന വിശ്വാസികൾക്ക്, ഒരു കുഞ്ഞിനെ ഗർഭം ധരിക്കുന്നത് മുതൽ പ്രസവം, അതിനെ വളർത്തൽ, ചികിത്സ, വിദ്യാഭ്യാസം നൽകൽ തുടങ്ങി അതിനെ സ്വന്തം കാലിൽ നില്ക്കാൻ പ്രാപ്തിയിൽ എത്തിക്കുന്നത് വരെ ഉള്ള സാമ്പത്തികവും അല്ലാത്തതുമായ ഭാരിച്ച ഉത്തരവാദിത്തത്തെയും ചിലവുകളെയും സംബന്ധിച്ചു നല്ല തിരിച്ചറിവുണ്ടെന്നതാണ്. അല്ലെങ്കിൽ ഇവരൊക്കെ ആഹ്വാനിച്ചു തുടങ്ങിയപ്പോൾ മുതൽ അവർ പരിശ്രമിച്ചിരുന്നെങ്കിൽ ഇന്ത്യയുടെ ജനസംഖ്യ 200-250 കോടിയെങ്കിലും കവിഞ്ഞേനെ. 

സന്താനോൽപ്പാദനം ആയിക്കോട്ടെ സന്താന നിയന്ത്രണം ആയിക്കോട്ടെ, അത് വ്യക്തിയുടെ സ്വാതന്ത്ര്യത്തിലും സ്വകാര്യതയിലും പെട്ട വിഷയമാണ്; അതിലൊക്കെ കയറി ഇടപെടാൻ ഇവർക്കൊക്കെ ആരാണ് അനുവാദം കൊടുത്തത് ??? ഇന്ത്യ എന്ന സ്വതന്ത്ര പരമാധികാര റിപബ്ലിക്കിൽ ജീവിക്കുന്ന പൗരന്മാർ എന്ന നിലയിൽ ഒരു കാര്യം യാചിക്കുകയാണ്;  "കുറഞ്ഞ പക്ഷം ഞങ്ങളുടെ കിടപ്പറയിലും പ്രത്യുൽപ്പാദനത്തിലും എങ്കിലും ഞങ്ങൾ ഭരണ ഘടന അനുവദിക്കുന്ന സ്വാതന്ത്ര്യം അനുഭവിച്ചോട്ടെ....." 

വാൽക്കഷണം : 2011- ൽ സംസ്ഥാനത്ത്‌ നിലവിലുള്ള നിയമങ്ങള്‍ കാലോചിതമായി പരിഷ്കരിക്കുന്നതിന്‌ ജസ്റ്റിസ്‌ വി.ആര്‍ കൃഷ്ണയ്യര്‍ അധ്യക്ഷനായുള്ള നിയമ പരിഷ്കരണ സമിതി ജനസംഖ്യാ നിയന്ത്രണത്തിനു നിയമം നിര്‍മിക്കണമെന്നു സര്‍ക്കാരിനോട്‌ ശിപാര്‍ശ ചെയ്തിരുന്നു. കേരള ഫാമിലി പ്ലാനിംഗ്‌ ആന്‍ഡ്‌ ബര്‍ത്ത്‌ കണ്‍ട്രോള്‍ എന്ന പേരില്‍ നിയമം നടപ്പാക്കണമെന്നായിരുന്നു സമിതിയുടെ പ്രധാന ശിപാര്‍ശ. രണ്ടു കുട്ടികള്‍ മാത്രം മതിയെന്നും കുട്ടികള്‍ രണ്ടില്‍ കൂടുതലായാല്‍ പതിനായിരം രൂപ സര്‍ക്കാരിലേക്ക്‌ പിഴ അടയ്ക്കണമെന്നുമായിരുന്നു പ്രധാന നിര്‍ദേശം. ഈ കുട്ടികള്‍ക്ക്‌ സര്‍ക്കാരിന്റെ ഭാഗത്തു നിന്നുള്ള വിദ്യാഭ്യാസ സഹായങ്ങളോ മറ്റ്‌ ആനുകൂല്യങ്ങളോ നല്‍കരുതെന്നും നിര്‍ദേശമുണ്ട്‌. എന്നാല്‍, ആദ്യ കുട്ടികള്‍ക്ക്‌ പരമാവധി സഹായം സര്‍ക്കാര്‍ നല്‍കണമെന്നും കരടില്‍ വ്യക്തമാക്കിയിട്ടുണ്ട്‌. ചില സമുദായങ്ങള്‍ കൂടുതല്‍ കുട്ടികള്‍ വേണമെന്ന നിര്‍ദേശം നല്‍കി അംഗസംഖ്യ വര്‍ധിപ്പിച്ചു പലതും കൂട്ടായി നേടിയെടുക്കാന്‍ ശ്രമിക്കുന്നത്‌ സംസ്ഥാനത്തിന്റെ സമ്പദ്‌വ്യവസ്ഥ തകിടം മറിക്കുമെന്നതിനാലാണ്‌ ഇത്തരമൊരു നിയമ നിര്‍മാണത്തിന്‌ ശിപാര്‍ശ ചെയ്യുന്നതെന്നായിരുന്നു സമിതിയുടെ വിശദീകരണം. ജാതി, മതം, ഉപവിഭാഗങ്ങള്‍, വര്‍ഗം, പ്രദേശം എന്നിവയുടെ അടിസ്ഥാനത്തില്‍, വ്യക്തികളോ സംഘടനകളോ കൂടുതല്‍ കുട്ടികള്‍ക്ക് ജന്മം നല്‍കാന്‍ പ്രോല്‍സാഹിപ്പിക്കുന്നതിനെ നിരോധിക്കണമെന്നും കരട്‌ രേഖയില്‍ പറഞ്ഞിരുന്നു. ഈ നിർദ്ദേശങ്ങളുടെ ഇപ്പോഴത്തെ അവസ്ഥ എന്തരാണോ എന്തോ ??? 

ഈ ബ്ലോഗിലെ പുതിയ പോസ്റ്റുകള്‍ ലഭിക്കാന്‍ താഴെയുള്ള ലിങ്കില്‍ ക്ലിക്ക് ചെയ്തിട്ടു ആ ഫേസ്‌ബുക്ക് പേജ് ലൈക്‌ ചെയ്യുക

അല്ലെങ്കില്‍  താഴെയുള്ള ലിങ്കില്‍ ക്ലിക്ക് ചെയ്തിട്ടു ആ ഫേസ്‌ബുക്ക് ഗ്രൂപ്പില്‍ ജോയിന്‍ ചെയ്യുക



Tuesday, 1 May 2018

അത്ര സുഖകരമല്ലാത്ത ചില സ്പർശനങ്ങൾ !!!

1999 ൽ കോഴിക്കോട് സര്‍വകലാശാല ജീവനക്കാരി പി ഇ ഉഷ, താൻ ബസിൽ വച്ച് പീഡനത്തിനിരയായി എന്ന് വിളിച്ചു പറഞ്ഞതാണ് പൊതുസ്ഥലങ്ങളിലെ പീഡനത്തെപ്പറ്റി കേരളത്തിൽ ഒരു സ്ത്രീ ഉറക്കെ വിളിച്ചു പറഞ്ഞ ആദ്യ സംഭവം. ആ വിളിച്ചു പറയലിൽ നിന്ന് ഊർജ്ജം ഉൾക്കൊണ്ട് പിന്നെ പലരും ഇത്തരം അനുഭവം വെളിച്ചത്തു കൊണ്ടുവരാൻ തയ്യാറായി. 

ഒരു അവാര്‍ഡ് ദാന ചടങ്ങിനിടെ ആള്‍ക്കൂട്ടത്തിനിടയില്‍ നിന്ന് ഒരു പതിനഞ്ചു വയസുകാരന്‍ തന്റെ നേരെ നടത്തിയ ലൈംഗിക അതിക്രമം തുറന്നു പറഞ്ഞത് മുൻ വിശ്വസുന്ദരിയും ബോളിവുഡ് താരവുമായ സുഷ്മിത സെൻ ആണ്. ആളെ കയ്യോടെ പിടി കൂടി; ആദ്യമൊക്കെ അവന്‍ കുറ്റം നിഷേധിച്ചെങ്കിലും ഒടുവില്‍ സമ്മതിച്ച് മാപ്പ് പറഞ്ഞു എന്നും കുട്ടിയുടെ ഭാവിയെ ഓര്‍ത്തും പതിനഞ്ച് വയസ്സെന്നത് ഇത്തരം കാര്യങ്ങള്‍ ഒരു കുറ്റകൃത്യമാണെന്ന് തിരിച്ചറിയാനുള്ള പ്രായമല്ലാത്തതിതിനാലും താന്‍ അവനെതിരെ നിയമനടപടികളൊന്നും സ്വീകരിച്ചില്ലെന്നും സുഷ്മിത കൂട്ടിച്ചേര്‍ത്തു. ബോഡി ഗാര്‍ഡുമാരുടെ അകമ്പടിയിൽ നടക്കുന്ന താരങ്ങൾക്ക് പോലും ഇത്തരം കയ്യേറ്റങ്ങളിൽ നിന്ന് രക്ഷപെടാനാവുന്നില്ല. 

തീയേറ്ററുകളിൽ സി സി ടി വി ഇല്ലാത്ത എൺപതുകളുടെ ആദ്യകാലത്ത് കോളേജിൽ നിന്ന് മാറ്റിനി കാണാൻ പോയപ്പോൾ തനിക്കും കൂട്ടുകാരികൾക്കും നേർക്കുണ്ടായ ശാരീരിക കടന്നു കയറ്റങ്ങൾ വിളിച്ചു പറഞ്ഞത് എഴുത്തുകാരിയും അധ്യാപികയുമായ ശാരദക്കുട്ടിയാണ്. സിനിമ തുടങ്ങി കുറച്ചു കഴിഞ്ഞപ്പോൾ ചെറിയ തോണ്ടലുകൾ, കുത്തലുകൾ ഒക്കെയായി തുടങ്ങിയ അതിക്രമങ്ങൾ പരമ്പരാഗത ആയുധങ്ങളായ സേഫ്റ്റി പിൻ, ബ്ലേഡ് ഒക്കെക്കൊണ്ട് പ്രതിരോധിച്ചെങ്കിലും അതിക്രമങ്ങൾക്ക് ശമനമുണ്ടായില്ല. പിന്നെയത് പിന്നിലൂടെയും വശങ്ങളിലൂടെയും ഉള്ള പരതൽ ആയി പരിണമിച്ചപ്പോൾ തിയ്യറ്റർ മാനേജറുടെ ഓഫീസിൽ ചെന്ന് പരാതിപ്പെട്ടു. തിയ്യറ്റർ അധികൃതർ ഉടനെ വന്ന് ശല്യക്കാരെ താക്കീത് ചെയ്തതല്ലാതെ ഇറക്കി വിട്ടു പോലുമില്ല എന്നവർ പറയുന്നു. 

അടുത്തയിടെ Hasna Shahitha Gypsi എന്ന യുവതി, തൃശൂർ പൂരത്തിനും ഉത്രാളിക്കാവ് ഉത്സവത്തിനും പോയപ്പോൾ ഉണ്ടായ ശാരീരിക കടന്നുകയറ്റങ്ങളുടെ അനുഭവ പശ്ചാത്തലത്തിൽ എഴുതിയ ഒരു കുറിപ്പ് ഇപ്പോൾ സോഷ്യൽ മീഡിയയിൽ വൈറൽ ആയിരുന്നു. വൈറൽ എന്നതിനേക്കാൾ ആ സ്ത്രീയുടെയും അവരോട് അനുഭാവം പ്രകടിപ്പുന്നവരുടെയും ഫേസ്‌ബുക്ക് ടൈംലൈനുകളിൽ തെറിയുടെയും അശ്‌ളീലകമന്റുകളുടെയും പൂരവെടിക്കെട്ട് ആയിരുന്നു നടന്നത്. ഒരു പക്ഷെ,  ആ കുറിപ്പിൽ, അവർ ഉപയോഗിച്ച "തൃശൂർ പൂരം" "ഉത്രാളിക്കാവ് ക്ഷേത്രോത്സവം" എന്ന വാക്കുകളും എഴുതിയ ആളുടെ മുസ്ലിം പേരും ആവണം അതിനെ ഇത്രയ്ക്ക് സെൻസേഷണൽ ആക്കിയത്. ആ കുറിപ്പിൽ നിന്ന് പൂരവിശഷണങ്ങൾ ഒഴിവാക്കി തൃശൂർ പൂരമെന്ന വാക്ക് ആൾക്കൂട്ടം എന്ന് റീ പ്ളേസ് ചെയ്താൽ യാഥാർഥ്യബോധത്തോടെ ഈ സമൂഹത്തെ നിരീക്ഷിച്ചു ജീവിക്കുന്ന ഒരാൾക്ക് നിഷേധിക്കാനാവാത്ത യാഥാർഥ്യങ്ങൾ തന്നെ ആയിരുന്നു അവർ കുറിച്ചത്. ആൾക്കൂട്ടത്തിലെ ലൈംഗിക കടന്നുകയറ്റം എന്ന ജനറലൈസേഷനിലോ പൂരം, ഉത്സവം, പള്ളിപ്പെരുന്നാൾ, ചന്ദനക്കുടം, സമ്മേളനം ഇതൊക്കെ ചേർത്ത് ഒരു ബാലൻസിങ് ലൈനിലോ എഴുതിയിരുന്നെങ്കിൽ ആ കുറിപ്പ് വലിയ എതിർപ്പില്ലാതെ സ്വീകരിക്കപ്പെടുമായിരുന്നു. പക്ഷെ, എങ്ങനെ എഴുതണം, എന്തെഴുതണം എന്നത് എഴുതുന്നയാളിന്റെ 101% സ്വാതന്ത്ര്യത്തിന് വിട്ടു കൊടുക്കേണ്ട കാര്യമാണ്. മതമൗലിക വാദികളുടെ ആക്രോശങ്ങൾ വിട്ടു കളഞ്ഞാൽ, ആ കുറിപ്പിലെ പ്രതിപാദ്യ വിഷയം അതീവ പ്രാധാന്യത്തോടെ ചർച്ച ചെയ്യേണ്ട ഒന്നാണ്. ഒരു നൂറ്റാണ്ട് കഴിഞ്ഞാലും ഇവിടെ മാറ്റം വരാൻ സാധ്യതയില്ലാത്ത സാമൂഹ്യതിന്മയെപറ്റിയാണ് ആ കുറിപ്പ് വിളിച്ചു പറഞ്ഞത്. 

പ്രസ്തുത വിഷയത്തിൽ ഒരു കുറിപ്പ് ഈയുള്ളവനും ഫേസ്‌ബുക്കിൽ ഇട്ടിരുന്നു. അതിൽ തെറി വിളി ഒന്നും  ഉണ്ടായില്ലെങ്കിലും, പലരും രൂക്ഷമായി തന്നെയാണ് പ്രതികരിച്ചത്. പ്രതികരണങ്ങൾ കൂടുതലും, പാട്രിയാർക്കിയുടെ അപ്പോസ്തലന്മാരുടെയും സ്ത്രീകളെ സദാചാരവസ്ത്രം ധരിപ്പിക്കാൻ പ്രതിജ്ഞാബദ്ധരായവരുടെയും ഭാഗത്ത് നിന്നായിരുന്നു. അപ്പോഴാണ് മെസ്സേജ് ഇൻബോക്സിൽ എന്റെ ഒരു പഴയ കൂട്ടുകാരി ഈ "തട്ട് മുട്ട് തപ്പൽ" കലാപരിപാടിയെപ്പറ്റി ഒരു ബ്ലോഗ് പോസ്റ്റ് എഴുതിക്കൂടേ എന്ന് ചോദിച്ചത്. എന്നാൽ ഒരു കൈ നോക്കിയേക്കാം എന്ന് കരുതി. ഒരു യാത്രക്കുള്ള ഒരുക്കത്തിലായതു കൊണ്ട്‌ തട്ടിക്കൂട്ടിയുള്ള ഈ എഴുത്തിൽ ഒരു അടുക്കും ചിട്ടയും ഈ പോസ്റ്റിൽ ഉണ്ടാകില്ലെന്ന് മുൻ‌കൂർ ജാമ്യമെടുക്കുന്നു.    

തൃശൂർ പൂരമെന്നില്ല... പള്ളിപ്പെരുന്നാളോ ചന്ദനക്കുടമോ എന്നില്ല; ചെറുതോ വലുതോ ആയ ഏത് ആൾക്കൂട്ടത്തിന് നടുവിലും ഒരു സ്ത്രീ വന്ന് പെട്ടാൽ..... അത് ബാലികയോ കുമാരിയോ യുവതിയോ മധ്യവയസ്‌കയോ വൃദ്ധയോ ഏത് പ്രായക്കാരിയും ആയിക്കോട്ടെ... അവളുടെ അവസ്ഥ അത്ര സുരക്ഷിതമായ ഒന്നാണോ എന്നറിയാൻ വലിയ റിസേർച്ച് ഒന്നും ചെയ്യണ്ട; സ്വന്തം വീട്ടിലും പരിചയത്തിലും ഉള്ള സ്ത്രീകളോട് മാത്രം ഒന്ന് ചോദിച്ചാൽ മതി. നൂറ് കണക്കിന് കഥകളുണ്ടാകും പറയാൻ. തപ്പൽ, ജാക്കി, ഞെക്ക്, പീച്ച്, എർത്തിങ് തുടങ്ങിയ "സാങ്കേതിക"നാമങ്ങളിൽ അറിയപ്പെടുന്ന ശാരീരികകടന്നു കയറ്റങ്ങൾക്ക് ഒരിക്കലെങ്കിലും ഇരയാകാത്ത ഒരു പെണ്ണും ഈ നാട്ടിൽ ഉണ്ടാവാൻ ഇടയില്ല. നമ്മു­ടെ­ നാട്ടി ലെ­ ബസ്സു­കളി­ലും തീ­വണ്ടി­കളി­ലും ഇത് ഒട്ടും അസാധാരണ അനുഭവമല്ലെന്ന് കണ്ണ് തുറന്ന് ജീവിക്കുന്ന ഏതൊരാൾക്കും എളുപ്പത്തിൽ മനസിലാവും. പൊതുസ്ഥലത്തും ബസിലും ട്രെയിനിലും ഇത്തരം അതിക്രമങ്ങൾക്കിരയാകുന്നത് സ്ത്രീകൾ മാത്രമല്ല എന്ന സത്യം ചർച്ച ചെയ്യപ്പെടാതെ അവശേഷിക്കുന്നു; അത്തരം സന്ദർഭങ്ങളിൽ പൊതുവെ ഇരകളും പ്രതികളും പുരുഷന്മാർ ആണെന്നതാണ് യാഥാർഥ്യം.

എന്തിനാണ്, വലിയ ആൾക്കൂട്ടം !!???. പണി നന്നായി അറിയാവുന്നവർക്ക് ആൾക്കൂട്ടം ഉണ്ടാക്കാൻ വലിയ ബുദ്ധിമുട്ടൊന്നും ഉണ്ടാവില്ല. ശരീരത്തിന്റെ 75% വും സീറ്റിന് പുറത്തേക്കിട്ട് ഇടുങ്ങിയ വഴിയിൽ കൂടി നടക്കുന്ന ക്യാബിൻ ക്രൂസിനെ തട്ടുകയും മുട്ടുകയും ചെയ്യുന്ന ചില മലയാളി വിമാനയാത്രക്കാരെപ്പറ്റി ഉമ്മർ ഫറൂക്കിഎന്നൊരാൾ സോഷ്യൽ മീഡിയയിൽ എഴുതിയ കുറിപ്പ് വായിച്ചതോർക്കുന്നു. തട്ടാനും മുട്ടാനും വേണ്ടി ഒരൊറ്റ വ്യക്തി സൃഷ്ടിച്ചെടുക്കുന്ന "തിക്കിന്റെയും തിരക്കി"ന്റെയും സാധ്യതയാണ് അയാൾ പറഞ്ഞു വച്ചത്. നമ്മുടെ സ്ത്രീകൾ തിരക്കുള്ള ഇടങ്ങൾ പരമാവധി ഒഴിവാക്കുന്നതിന്റെ പിന്നിൽ ഈ കടന്നുകയറ്റങ്ങൾ ആണ് എന്ന് നിസ്സംശയം പറയാം. "അവൻ പെരുന്നാളുകൾക്കു പോകുമായിരുന്നെങ്കിലും, മര്യാദക്കാരനായിരുന്നു" എന്ന പുകഴ്ച, അഞ്ചാം നൂറ്റാണ്ടിലെ റോമൻ ഉത്തരാഫ്രിക്കയിലെ ഒരു ശവകുടീരത്തിൽ കണ്ടതായി, സെയ്ന്റ്‌ അഗസ്റ്റിന്റെ ജീവചരിത്രത്തിൽ പീറ്റർ ബ്രൗൺ പറയുന്നുണ്ട്‌. അപ്പോൾ ഇതിന്നും ഇന്നലെയും തുടങ്ങിയതല്ലെന്നും വേണം മനസിലാക്കാൻ.  

വിമാനയാത്രക്കിടയിൽ കൈകുസൃതി കാണിച്ചതിന് ഒരു മന്ത്രി പുലിവാല് പിടിച്ച നാടാണ് നമ്മുടേതെന്ന് കൂടി ഓർക്കണം. നമ്മുടെ നിയമസഭയിൽ "വിഖ്യാത ലഡ്ഡു ബജറ്റി"നിടയിൽ ഇടത് വനിതാസാമാജികരെയും കൊല്ലത്തെ വള്ളംകളി മത്സരവേദിയില്‍ വെച്ച് നടി ശ്വേതാമേനോനെയും തൊട്ട് നോക്കി എന്ന ആരോപണത്തിൽ നമ്മുടെ നേതാക്കന്മാർ പിടിച്ച പുകിലുകൾ ഓർക്കുന്നില്ലേ !!??? ഒരു പാർട്ടിക്കിടയിൽ ഐ പി എസുകാരിയുടെ നിതംബത്തിൽ ചുമ്മാ ഒന്ന് തടവി നോക്കിയെന്ന് ആരോപണം നേരിട്ട പഞ്ചാബ് സംസ്ഥാന പോലീസ് മേധാവിയെ മറന്നോ നമ്മൾ ? കഴിഞ്ഞ  ദിവസം, ഒരു വനിതാ മാധ്യമപ്രവർത്തകയുടെ കവിളിൽ തലോടി നോക്കി പണി വാങ്ങിയത് ഒരു സംസ്ഥാനത്തിന്റെ ഗവർണ്ണർ ആയിരുന്നു.  

പഞ്ചേന്ദ്രിയങ്ങൾ സമ്മാനിക്കുന്ന അനുഭവങ്ങളിൽ ഏറ്റവും തീവ്രം ത്വക്ക് നൽകുന്ന സ്പർശനം എന്ന അനുഭവമാണെന്ന് എവിടെയോ വായിച്ചിട്ടുണ്ട്. മനസിന് ആനന്ദം നൽ­കു­ന്ന ഒരു­ സ്പർ­ശനം ആഗ്രഹി­ക്കാത്തവരാ­യി­ ആരാണുള്ളത് ? ടച്ച് ടെക്നോളജി വിസ്ഫോടനത്തിന്റെ കാലത്ത് ജീവിക്കുന്ന ആരാണിവിടെ തോണ്ടാത്തത്. രാവിലെ ഉണരുന്നത് മുതൽ ഉറങ്ങുന്നത് വരെ എണ്ണമറ്റ തോണ്ടലുകൾ നടത്തുന്നവരാണ് നമ്മൾ. പക്ഷെ, തോണ്ടലും ഉരുമ്മലും ടച്ചിങ്ങും തലോടലും അനുവാദമില്ലാതെ മറ്റൊരു വ്യക്തിയുടെ ശരീരത്തിലാവുമ്പോൾ അത് ക്രൈം ആകും എന്ന തിരിച്ചറിവ് ഉണ്ടാകണം. ഉണ്ടായില്ലെങ്കിൽ ധനനഷ്ടം, മാനഹാനി ഒക്കെ ഉണ്ടാകാൻ സാധ്യതയുണ്ട്. തൊടുന്നവർക്ക് സുഖം പകർന്നേക്കാമെങ്കിലും തൊടൽ ഏൽക്കുന്നവർക്ക് അത് പൊള്ളലും വേദനയും നീറ്റലും അറപ്പും വെറുപ്പും ഒക്കെയായി അവശേഷിക്കും.

ആധുനിക 'ഡെവലപ്മെന്റല്‍ സൈക്കോളജി' പറയുന്നത് അച്ഛനുമമ്മയും മതിവരുവോളം നല്ല സ്പര്‍ശനം കൊടുത്ത് കുട്ടിയെ വളര്‍ത്തിയാല്‍ കുട്ടി സ്മാര്‍ട്ടാകും എന്നാണ്. സ്വാഭാവികമായും കിട്ടേണ്ട പ്രായത്തില്‍ കിട്ടേണ്ടത്ര അളവിൽ സ്പർശനം കിട്ടാത്തവര്‍ എവിടെ നിന്നെങ്കിലും ആ കുറവ് അത് കോമ്പൻസേറ്റ് ചെയ്യാൻ ശ്രമിക്കും. അങ്ങനെയുള്ളവരാണ് ആള്‍ക്കൂട്ടത്തിനിടയിലും ബസിലും ഒക്കെ സ്പര്‍ശന സുഖം തേടുന്നതത്രെ. മനസ്സില്‍ സ്പര്‍ശനസുഖത്തിന്റെ ഗൂഢ ഉദ്ദേശ്യത്തിലാണ് ഒരാളുടെ ഫോക്കസ് എങ്കില്‍ എവിടെപ്പോയാലും 'തക്കം കിട്ടിയാല്‍' അയാളുടെ ശരീരം സ്പര്‍ശനസുഖാനുഭവത്തിന് ശ്രമിച്ചെന്ന് വരും. അത്തരം ഞരമ്പു രോഗികൾ, പ്രോത്സാഹനഭാവത്തിൽ ഹസ്തദാനം കൊടുക്കുമ്പോഴും കരുണാഭാവത്തിൽ രോഗിയെ ആശ്വസിപ്പിക്കുമ്പോഴും കരുതൽഭാവത്തിൽ അനാഥരെ ആശ്ലേഷിക്കുമ്പോഴും അതിനിടയിൽ ഒരു ഉദ്ധിതലിംഗം തിരുകി നിർത്തും !!!

വാൽക്കഷണം : തിരക്കുള്ള ബസ് യാത്രക്കിടെ പിന്നിൽ നിന്ന് സപ്പോർട്ട് കൊടുക്കാൻ ചെല്ലുന്ന ജാക്കിച്ചായന്മാരുടെ പരാക്രമത്തിന് നേരെ 25 CC സിറിഞ്ചിന്റെ സൂചി പ്രയോഗിച്ചിരുന്ന ഒരു കൂട്ടുകാരി എനിക്കുണ്ടായിരുന്നു. സപ്പോർട്ട് പണിയോട് സഹകരിക്കുന്നു എന്ന തോന്നൽ ഉണ്ടാക്കിയ ശേഷം പ്രസക്ത ഭാഗങ്ങളിൽ കുത്തിവയ്പ്പ് സൂചി നിഷ്കരുണം തറച്ചു കയറ്റലായിരുന്നു കക്ഷിയുടെ മോഡസ് ഓപ്പറാണ്ടി. അപരനെ ബഹുമാനിക്കാൻ പഠിക്കാത്തവരുടെ ലോകത്ത്, കൃത്രിമമായി സൃഷ്ടിക്കപ്പെടുന്ന തിരക്കുകളിൽ കൃത്യതയോടെ കൈകൾ ലക്ഷ്യത്തിലെത്തിക്കാൻ വൈഭവമുള്ളവർക്കിടയിൽ, കുത്തിവയ്പ്പ് സൂചിയും സേഫ്റ്റി പിന്നും കൂർപ്പിച്ച നഖവും ഒക്കെത്തന്നെ ശരണം...

ഒരു നല്ല ബസ് കണ്ടക്റ്ററെപ്പറ്റി ആരോ എഴുതിയ ഒരു കുറിപ്പ് വായിച്ചത് കൂടി ഓർക്കുന്നു. അങ്ങേര്‌ കണ്ടക്റ്റ് ചെയ്യുന്ന ബസ്സില്‍ ഒരാള് പോലും ജാക്കിപ്പണിക്ക് പോകില്ല.... ആരെങ്കിലും സ്ത്രീകളെ മുട്ടി നിൽക്കുന്നത് ശ്രദ്ധയിൽപ്പെട്ടാൽ അങ്ങേര് ഉറക്കെ വിളിച്ചു പറയും ...."മുട്ടിയവര്‍ മുട്ടിയവര്‍ പിന്നിലോട്ട് മാറി നില്‍ക്ക്... ഇനിയും മുട്ടാത്തവർക്ക് ഒരവസരം കൊടുക്ക്..." അത് പോലെ ചില സമയങ്ങളിൽ അങ്ങേരുടെ ഡയലോഗ് ഇങ്ങനെയായിരിക്കും "ചേട്ടാ ഈ വണ്ടിയുടെ പുറകുവശവും എറണാകുളത്തേക്ക് തന്നെയാ പോകുന്നത്; പിന്നിലോട്ടിറങ്ങി നിക്ക്..." ഇത് കേട്ടാല്‍ എന്തെങ്കിലും ദുരുദ്ദേശവുമായി നിൽക്കുന്നവർ പോലും മാന്യമായ അകലം പാലിക്കാൻ നിർബന്ധിതർ ആകും. അദ്ദേഹത്തിന്റെ ബസ്സില്‍ എപ്പോഴും സ്ത്രീകള്‍ക്കും പുരുഷന്‍മാര്‍ക്കും ഇടയില്‍ ഒരു ഒപ്റ്റിമം ഗ്യാപ്പ് ഉണ്ടാകുമായിരുന്നത്രെ. 

ഈ ബ്ലോഗിലെ പുതിയ പോസ്റ്റുകള്‍ ലഭിക്കാന്‍ താഴെയുള്ള ലിങ്കില്‍ ക്ലിക്ക് ചെയ്തിട്ടു ആ ഫേസ്‌ബുക്ക് പേജ് ലൈക്‌ ചെയ്യുക



അല്ലെങ്കില്‍  താഴെയുള്ള ലിങ്കില്‍ ക്ലിക്ക് ചെയ്തിട്ടു ആ ഫേസ്‌ബുക്ക് ഗ്രൂപ്പില്‍ ജോയിന്‍ ചെയ്യുക

Friday, 13 April 2018

കത്തുവ, ഉന്നാവോ ബലാത്സംഗങ്ങളെക്കുറിച്ച് പ്രധാനമന്ത്രിയുടെയും ബി ജെ പി ഉന്നത നേതാക്കളുടെയും പ്രതികരണം....



കത്തുവ, ഉന്നാവോ ബലാത്സംഗങ്ങളെക്കുറിച്ച് 
പ്രധാനമന്ത്രിയും ബി ജെ പി ഉന്നത നേതാക്കളും

ഇത് വരെ പ്രതികരിച്ചതായി അറിവില്ല. 

പ്രതികരിച്ചാൽ ഉടനെ 
പോസ്റ്റ് അപ്പ്‌ഡേറ്റ് ചെയ്യുന്നതായിരിക്കും.....(11:47 am, 13.04.2018)


Breaking Update : 

ഇന്ത്യയെ നടുക്കിയ രണ്ട് ബലാത്സംഗകേസുകളില്‍ രാജ്യമൊട്ടാകെ ഉയർന്ന പ്രതിഷേധങ്ങൾക്കൊടുവിൽ പ്രധാനമന്ത്രി നരേന്ദ്രമോദി മൌനം ഭഞ്ജിച്ചു. കത്തുവ, ഉന്നാവോ ബലാത്സംഗക്കേസുകളിൽ നരേന്ദ്രമോദിയുടെ മൌനം വിവാദമായിരുന്നു.

“കഴിഞ്ഞ രണ്ട് ദിവസമായി ഇവിടെ നടന്നുകൊണ്ടിരിക്കുന്ന സംഭവങ്ങള്‍ സംസ്‌കാരമുള്ള ഒരു സമൂഹത്തിന് ചേരുന്നതല്ല. ഒരു രാജ്യമെന്ന നിലയിലും ഒരു സമൂഹമെന്ന നിലയിലും നാമെല്ലാവരും ഇതില്‍ ലജ്ജിക്കുന്നു. ഈ അവസരത്തില്‍ ഒരു കുറ്റവാളികളും രക്ഷപ്പെടുകയില്ലെന്ന് ഇരകള്‍ക്ക് പൂര്‍ണ്ണമായ നീതി ലഭിക്കുമെന്നും ഞാന്‍ ഉറപ്പ് നല്‍കുന്നു. നമ്മുടെ പെണ്‍മക്കള്‍ക്ക് നീതി ലഭിക്കുക തന്നെ ചെയ്യും”
ഇതായിരുന്നു പ്രധാനമന്ത്രിയുടെ പ്രതികരണം.
രാജ്യമൊട്ടാകെ പ്രതിഷേധങ്ങൾ വ്യാപിക്കുമ്പോഴും കത്തുവ, ഉന്നാവോ ബലാത്സംഗങ്ങളെക്കുറിച്ച് പ്രധാനമന്ത്രി മൗനം ദീക്ഷിച്ചതിനെതിരെ thequint.com വേറിട്ട ഒരു പ്രതിഷേധം ഉയർത്തിയിരുന്നു. പിന്നീട് ദി വയർ, നാഷണൽ ഹെറാൾഡ് തുടങ്ങി നിരവധി മാധ്യമങ്ങൾ ഈ ക്യാമ്പയിൻ ഏറ്റെടുത്തു. അതിനോട് ഐകദാർഢ്യം പ്രഖ്യാപിച്ച് ചെയ്തതായിരുന്നു ഈ ക്യാമ്പയിൻ. 

പ്രധാനമന്ത്രിയുടെ പ്രതികരണമെന്ന തലക്കെട്ടിനു താഴെ

(കഠുവ, ഉന്നാവോ ബലാത്സംഗങ്ങളെക്കുറിച്ച് പ്രധാനമന്ത്രി നരേന്ദ്രമോദി പ്രതികരിച്ചതിന് ശേഷം ഈ വാര്‍ത്ത അപ്ഡേറ്റ് ചെയ്യുന്നതായിരിക്കും)

എന്നെഴുതിയായിരുന്നു ക്വിന്റിന്റെ പ്രതിഷേധം.

Note : ഈ തലക്കെട്ടിൽ വാർത്ത പ്രസിദ്ധീകരിച്ചത് രാവിലെ 11:47-നായിരുന്നു. പിന്നീട് 7:37 പിഎമ്മിനു പ്രധാനമന്ത്രിയുടെ പ്രതികരണം വരുന്നതുവരെയും തലക്കെട്ടിനു താഴെയുള്ള വാർത്താ കോളം ഒഴിഞ്ഞു കിടക്കുകയായിരുന്നു.



1975 ജൂൺ 26 ന് അന്നത്തെ പ്രധാനമന്ത്രി ശ്രീമതി ഇന്ദിര ഗാന്ധി അടിയന്തിരാവസ്ഥ പ്രഖ്യാപിക്കുകയും തുടർന്ന് 21 മാസത്തോളം രാജ്യത്ത് തെരഞ്ഞെടുപ്പുകളും മൗലികാവകാശങ്ങളും സസ്‌പെൻഡ് ചെയ്യപ്പെടുകയും മാധ്യമസ്വാതന്ത്ര്യം സെൻസർ ചെയ്യപ്പെടുകയും ചെയ്തപ്പോൾ "ഇന്ത്യൻ എക്സ്പ്രസ്സ്" പത്രം ഇത് പോലൊരു വേറിട്ട പ്രതിഷേധം നടത്തിയതായി വായിച്ചിട്ടുണ്ട്. പത്രത്തിന്റെ എഡിറ്റോറിയൽ കോളം പ്രിന്റ് ചെയ്യാതെ "Blank" ആയി വിട്ട് കൊണ്ടാണ് അന്ന്  "ഇന്ത്യൻ എക്സ്പ്രസ്സ്" ഇന്ദിരയോട് പ്രതിഷേധിച്ചത്. ഇപ്പോൾ ക്വിന്റിന്റെ വേറിട്ട പ്രതിഷേധം കണ്ടപ്പോൾ ഇത് ഓർത്തെന്ന് മാത്രം.
 
ഈ ബ്ലോഗിലെ പുതിയ പോസ്റ്റുകള്‍ ലഭിക്കാന്‍ താഴെയുള്ള ലിങ്കില്‍ ക്ലിക്ക് ചെയ്തിട്ടു ആ ഫേസ്‌ബുക്ക് പേജ് ലൈക്‌ ചെയ്യുക

https://www.facebook.com/achayatharangal.blogspot.in


അല്ലെങ്കില്‍ 
 താഴെയുള്ള ലിങ്കില്‍ ക്ലിക്ക് ചെയ്തിട്ടു ആ ഫേസ്‌ബുക്ക് ഗ്രൂപ്പില്‍ ജോയിന്‍ ചെയ്യുക